ՀՀ կառավարության 2011թ. մայիսի 13-ի որոշմամբ օպտիմալացման ծրագրի շրջանակներում Վանաձորի երկու բուժհիմնարկների՝ թիվ 1 հիվանդանոցային համալիրի և թիվ 2 հիվանդանոցի միավորման արդյունքում ստեղծվեց նոր բուժհաստատություն` «Վանաձորի բժշկական կենտրոն»: Առայժմ բժշկական կենտրոնի կազմում այդ երկու բուժհիմնարկները գործում են առանձին` յուրաքանչյուրն իր շենքում, իր բժշկական ծառայություններով` մինչև կենտրոնի համար ընդհանուր շենք կառուցվի:
«Առաջին լրատվական»-ին հայտնի դարձավ, որ Վանաձորի բժշկական կենտրոնի ստեղծումից հետո` 2011թ. դեկտեմբերից, տնօրենի պաշտոնակատար է նշանակվել Մհեր Մարգարյանը (նշված երկու բուժհիմնարկներից թիվ 1 հիվանդանոցային համալիրի տնօրենը), իսկ կենտրոնում տնօրենի հաստիքն այդպես էլ մնացել է թափուր՝ այդ պաշտոնի համար մրցույթ չի հայտարարվել:
Տնօրենի պաշտոնակատար Մհեր Մարգարյանից հետաքրքրվեցինք՝ ինչո՞ւ է նա մինչ օրս այդ կարգավիճակում: «Ես դա չեմ կարող ասել, դա կարող եք ճշտել մարզպետարանից, մարզպետարանն է իմ կարգավիճակը կարգավորում»,- ասաց Մհեր Մարգարյանը` հաստատելով, որ տնօրենի պաշտոնի համար իսկապես 2 տարի է՝ մրցույթ չի հայտարարվում: Հարցին` չի՞ էլ հետաքրքրվել՝ ստանալու այդ հարցի պատասխանը, նա ասաց. «Չէ, ինչ հետաքրքրվեմ, նշանակել են, աշխատում եմ, ուրիշ ինչ հետաքրքրվեմ»:
Նրա խոսքով՝ պաշտոնակատարի կարգավիճակը որևէ բան չի փոխում իր գործունեության մեջ. «Բացարձակապես ոչինչ չի փոխում, պարտականությունները նույնն են, իրավունքները, աշխատանքը՝ նույնպես: Իմ աշխատանքի վրա ոչ մի ազդեցություն դա չի թողնում, ես նորմալ աշխատում եմ` որպես տնօրեն»:
Փաստորեն ամբողջ խնդիրը մրցույթ չհայտարարելն է, իսկ պատճառների մասին գրավոր հարցում ենք ուղարկել Լոռու մարզպետին:
Տնօրենի պաշտոնակատար Մհեր Մարգարյանից հետաքրքրվեցինք նաև, թե որ փուլում է շենքի կառուցման գործընթացը: Ի պատասխան՝ նա ասաց, որ շինարարությունն սկսվել է այս տարվա հունվարից, հանրապետության նախագահի ներկայությամբ դրվել է հիմնաքարը, այժմ շարունակվում է: Նրա կարծիքով` այն կավարտվի մոտ կես տարում, և բժշկական կենտրոնը կտեղափոխվի նոր շենք:
Շենքի մասին հիշատակելուց հետո միայն պարոն Մարգարյանը ենթադրեց. «Հավանաբար, եթե որևէ գործընթացներ կան՝ կապված տնօրենի մրցույթի հետ, շենքի հետ է կապվում, որևէ բան չգիտեմ, չեմ կարող ասել»: Դիտարկմանը՝ եթե մրցույթ հայտարարվի, ինքն է՞լ կդիմի, ասաց. «Ապագայի մասին ոչինչ ասել չեմ կարող, այդ ժամանակ կորոշեմ»:
