Նմանատիպ բժշկական սարքերի ստեղծումը նորություն չէ: Արդեն վաղուց մտածվել են դյուրակիր տեսախցիկներով մի քանի սմ չափերով պարկուճներ, որոնք մարդու աղեստամոքսային ուղով անցնելիս գրանցում են տարբեր տեղեկություններ, հայտնում է vchaspik.ua-ն:
Carnegie Mellon University համալսարանի հետազոտողները, սակայն, Քրիստոֆեր Բեթինգերի ղեկավարությամբ ստեղծել են սովորական դեղապատիճի մեծության՝ բացարձակապես անվտանգ մարտկոց, որն ընդունակ է աշխատել 20 ժամ, որից հետո լուծվում է օրգանիզմում: Նրա հիմքում ընկած է մելանինի պիգմենտ, մանգանի օքսիդ, պղինձ և երկաթ: Այն ընդունակ է երկար ժամանակ սնուցել 5 միլիվատտ հզորությամբ սարքը:
Նմանատիպ տեխնոլոգիայով կարելի է պատրաստել ոչ միայն մարտկոցներ, այլ նաև տվիչներով դյուրակիր տեսախցիկներ, որոնք իրենց ֆունկցիան կատարելուց հետո կլուծվեն օրգանիզմում:
Ներկայումս նախագիծը գործնականում ավարտված է, և հետազոտողները աշխատում է անվնաս կենսաթաղանթ ստեղծելու վրա` սարքը օրգանիզմի ագրեսիվ ներքին միջավայրից պաշտպանելու համար:
