Առողջապահության համաշխարհային կազմակերպության (ԱՀԿ) տարածաշրջանային համաժողովի ընթացքում կարմրուկի համաճարակի դեմ պրոֆիլակտիկ աշխատանքներում Հայաստանի փորձը ճանաչվել է լավագույնը: Ինչպես տեղեկացնում է «Արմենպրեսսը», այս մասին հուլիսի 13-ին տեղի ունեցած մամլո-կոնֆերանսին հայտնել է Հայաստանի առողջապահության նախարարության դիմադրողականության ազգային ծրագրի ղեկավար Գայանե Սահակյանը:
«Վրաստանում և Ադրբեջանում կարմրուկի համաճարակային վիճակը շատ լուրջ է: Մտահոգված այդ հիմնախնդրով՝ ԱՀԿ-ն Թբիլիսիում անցկացրել է տարածաշրջանային համաժողով, որին մասնակցել են Հայաստանի, Ադրբեջանի, Վրաստանի, Թուրքիայի առողջապահության նախարարությունների ներկայացուցիչները, ինչպես նաև ներկայացուցիչներ՝ տարածաշրջանային մի շարք կազմակերպություններից»,- հաղորդել է Սահակյանը:
Համաժողովի ընթացքում յուրաքանչյուր երկիր ներկայացրել է իրենց մոտ առկա համաճարակային իրավիճակը, քննարկվել են հիվանդության տարածմանը և այն կանխարգելելուն առնչվող հարցեր:
Սահակյանի խոսքով՝ համաժողովի ժամանակ գովեստի խոսքեր են հնչել Հայաստանի հասցեին համաճարակային իրավիճակը վերահսկելու և կանխարգելիչ միջոցառումների համար:
«ԱՀԿ ներկայացուցիչները այլ երկրների ներկայացուցիչներին խորհուրդ են տվել ուսումնասիրել հայկական փորձը և համապատասխան դասեր քաղել»,- ասել է փորձագետը:
