Եվրոպայի երկրները համատեղ բանակի կարիք ունեն, միգրացիոն ալիքը ցույց է տվել, որ անհրաժեշտ է պաշտպանել ԵՄ արտաքին սահմաննները՝ հայտարարել է Չեխիայի վարչապետ Բոգուսլավ Սոբոտկան՝ ելույթ ունենալով ԱԳՆ-ում օտար երկրներում դեսպանների ավանդական օգոստոսյան հանդիպմանը։ Այս մասին հայտնում է Ceske noviny համացանցային պարբերականը։
Գերմանիայում հարձակումների շարքից և ֆրանսիական Նիսում ահաբեկչությունից հետո պարզ է դարձել, որ անհրաժեշտ է պատրաստ լինել ամենատարբեր տեսակների սպառնալիքների, իսկ միգրացիոն ալիքը հաստատել է, որ անհրաժեշտ է պաշտպանել ԵՄ արտաքին սահմանները՝ հայտարարել է վարչապետը։
«Ես համոզված եմ, որ հեռանկարում մենք չենք կարող առանց համատեղ եվրոպական բանակի»,- կարծում է Սոբոտկան։ Այդ ուղղությամբ առաջին հստակ առաջարկները վարչապետն ակնկալում է լսել արդեն Եվրոպական խորհրդի առաջիկա նիստերին։
Սոբոտկայի կարծիքով՝ չկա ԵՄ-ում Չեխիայի անդամակցության համար այլընտրանք, միևնույն ժամանակ ԵՄ-ն չի կարող Brexit-ից հետո պահպանվել նախկին տեսքով։
Աշխարհում աճում է ազգայնականությունը, մեծանում է փլուզվող պետությունների և միջազգային հակամարտությունների թիվը՝ ասել է վարչապետը։
«Տեղի ունեցող իրադարձություններն ուղեկցվում են միջազգային իրավունքի և միջազգային ինստիտուտների հանդեպ հարգանքի բացակայությամբ»,- կարծում է Սոբոտկան։ Դրա արդյունքում առաջանում են, մասնավորապես, այնպիսի խնդիրներ, ինչպիսին է Եվրոպա միգրացիոն ալիքը։
