Եվրոպան պետք է ջանքեր գործադրի Թուրքիայի հետ հարաբերություններում վստահությունը վերականգնելու համար: Այդպիսի կարծիք է հայտնել Եվրախորհրդի գլխավոր քարտուղար Թյորբորն Յագլանդը Le Monde պարբերականում հրապարակված հոդվածում:
«Ես վերջերս եղել եմ Անկարայում և տեսել եմ, թե ինչ խոշոր ավերածություններ են պատճառել խորհրդարանի շենքին ապստամբների ձեռքում գտնված ինքնաթիռների թռիչքները: Չի կարելի բռնության այդպիսի դրսևորումներ թույլ տալ եվրոպական հողում»,-ասված է հեդվածում:
«Անշուշտ Թուրքիայի կառավարության վերաբերյալ կարելի է ունենալ տարբեր տեսակետներ, սակայն ակնհայտ է, որ պետք է անթույլատրելի համարել օրինական, ժողովրդավարական ճանապարհով ընտրված կառավարության ուժով տապալման նման փորձերը: Ժողովրդավարական ինստիտուտների վրա այդպիսի հարձակումը հանդիսանում է մարտակոչ մեր բոլորի դեմ»,- գրել է Եվրախորհրդի ղեկավարը:
Նա նշել է, որ ներկա իրավիճակում «Թուրքիան հիասթափված է եվրոպական առաջնորդների դիրքորոշումից, որոնք, նրա կարծիքով՝ չեն ըմբռնել այն հարվածի մասշտաբները, ինչը թուրքական հասարակաության համար դարձել է պետական հեղաշրջման փորձ»:
«Եթե Եվրոպան ցանկանում է Թուրքիայի վրա դրական ազդեցության հնարավորություն ունենալ, ապա պետք է ցուցադրի իր համերաշխությունը նրա հետ, ինչպես նաև գիտակցի, ինչպիսին է այսօր թուրքերի մենթալիտետը»,- ընդգծել է նա:
Միաժամանակ, Յագլանդը ընդունում է, որ «ավելորդ ճնշումների» մասին ստացված տեղեկատվությունը, ուղղված այն մարդկանց դեմ, որոնք կասկածվում են ապստամբությանը մասնակցելու մեջ, «անհանգստություն է առաջացնում»:
«Թուրքիան անցնում է գոյատևման լարված և անկայուն փուլով: Մեզ՝ եվրոպացիներիս, այդպիսի իրավիճակում հարկ է հանդես գալ միասնական ճակատով, նպատակ ունենալով վերականգնել վստահությունը և փոխըմբռնումը, մնալով հուսալի, սակայն սթափությունը չկորցնող գործընկեր: Մեր ընդհանուր նպատակն է Թուրքիան տեսնել եվրոպական ընտանիքի կազմում»,- ընդգծել է նա:
