Հարավային Սուդանում որպես զինվոր շարունակում են հավաքագրել երեխաների։ Միայն այս տարվա սկզբից զինված խմբերի շարքերն են անցել ավելի քան 650 երեխաներ։ Ընդհանուր առմամբ 2013 թվականի վերջից 16 հազար անչափահասներ զենք են վերցրել իրենց ձեռքը։ Այս մասին հայտնում է ՄԱԿ-ի Մանկական հիմնադրամը։
ՅՈՒՆԻՍԵՖ-ում մտավախություն ունեն, որ երկրում բախումների վերսկսումը սպառնում է տասնյակ հազարավոր երեխաների։
2015 թվականին երկրում անցկացվել է դեմոբիլիզացիայի խոշորագույն արշավ, որի ընթացքում արձակվել է 1775 երեխա։ «Բախումների վերսկսումն ու հավաքագրումները Հարավային Սուդանում այդ գործընթացը ենթարկում են խափանման ռիսկի»,- ասվում է ՅՈՒՆԻՍԵՖ-ի հայտարարության մեջ։
Հուլիսի սկզբին՝ Հարավային Սուդանի անկախության 5-ամյակի շեմին, մայրաքաղաք Ջուբայում վերսկսվել են մարտերը կառավարական զորքերի և ընդդիմության միջև։
ՅՈՒՆԻՍԵՖ-ում նաև նշում են, որ աշխարհի ամենաերիտասարդ երկրում ներկայիս ճգնաժամի հետ խորանում է բռնությունը կանանց ու աղջիկների նկատմամբ։
2013 թվականից երկրում մոտ 900 հազար երեխաներ դարձել են ներքին տեղահանված, 250 հազարը չի ստանում անհրաժեշտ սնունդ, և երկրում երեխաների ավելի քան կեսը չի հաճախում դպրոց։ Դա ամենամեծ ցուցանիշն է աշխարհում՝ բնակչության թվաքանակի հարաբերակցությամբ։
