News Georgia լրատվական գործակալության փոխանցմամբ՝ Թուրքիայի ռազմածովային ուժերի նավը կգործարկվի Սև ծովի ափամերձ ջրերում (Աջարիայի Գոնիո զորավարժարանի մոտ) անհետացած վրացի երկու զինծառայողների որոնման աշխատանքներում:
Թուրքական նավը վաղն առավոտյան կհայտնվի այն վայրում, ուր անհետացել է 26-ամյա կապրալ Յագո Շարաձեն և 24-ամյա առաջին կարգի շարքային Գեորգի Նանետաշվիլին: Հայտնում է Վրաստանի ՊՆ մամլո ծառայությունը:
Թուրքական նավը հագեցած է որոնման սարքերով, նրա անձնակազմն ունի որոնողական-փրկարարական աշխատանքների փորձ: Վրաստանի պաշտպանության նախարար Լևան Իզորիան օգնության խնդրանքով Թուրքիային դիմել է երեկ:
Դրանից հետո Թուրքիան արդեն իսկ 9 մարդուց բաղկացած անձնակազմով մոտորանավակ է ուղարկել, որն արդեն իսկ ներգրավված է որոնողական աշխատանքներում:
