Խոչընդոտ չկա, որպեսզի ֆրանսիական «Կարֆուրն» իր սուպերմարկետը բացի Հայաստանում: Այսօր լրագրողների հետ հանդիպմանն այս մասին ասաց ՀՀ-ում Ֆրանսիայի արտակարգ և լիազոր դեսպան Անրի Ռենոն՝ պատասխանելով լրագրողի հարցին, թե ինչպես է գնահատում այն խոսակցությունները, թե որոշ օլիգարխներ փորձում են խոչընդոտել ֆրանսիական «Կարֆուրի» մուտքը Հայաստան:
Դեսպանն իր գոհունակությունը հայտնեց այն փաստի վերաբերյալ, որ հայաստանյան հանրությունը սպասում է ֆրանսիական «Կարֆուրի» մուտքին Հայաստան: «Այս կամ այն երկիր մուտք գործելու վճիռ կայացնում է հենց «Կարֆուրը», և բոլորովին վերջերս այդ ֆրանսիական ցանցը հաստատվեց նաև Վրաստանում»,- ասաց դեսպանն՝ ակնարկելով, որ «Կարֆուրն» ինքն է որոշում՝ մտնե՞լ Հայաստան, թե՞ ոչ, և նրա մուտքը Հայաստան չէր կարող խոչընդոտվել:
Անրի Ռենոն ասաց, որ իրեն ուրախացնում է, որ հայաստանյան բարձր պաշտոնյաները ևս «Կարֆուրը» Հայաստանում տեսնելու ցանկություն են հայտնում:
«Եթե ես ճիշտ եմ հիշում, ապա այդ մասին շատ հստակ ՀՀ ԱԺ-ում իր դիրքորոշումը հայտնեց վարչապետը: Ստացվում է, որ հիանալի ,փայլուն պայմաններ կան, որպեսզի «Կարֆուրը» գա Հայաստան, խոչընդոտ չկա, որ շուտով այն իր խանութը բացի Հայաստանում: Դա մի նոր, հաջողված առիթ կլինի, որպեսզի Ֆրանսիան իր տեղը գրավի Հայաստանում կայունացող շուկայական տնտեսությունում: Սա մի նախաձեռնություն է, որը շահեկան կլինի թե՛ ՀՀ տնտեսության, թե՛ հայ սպառողի համար: Ֆրանսիան իսկապես ցանկանում է, որ Ֆրանսիա-Հայաստան առևտրատնտեսական հարաբերությունները երկու ուղղություններով էլ ընթանան: Դա էլ հենց Ասոցացման պայմանագրի նպատակն է»,- պարզաբանեց Անրի Ռենոն:
Լուսանկարը՝ PanARMENIAN Photo-ի