Ամեն օր սիրիական բանտերում, որոնք գտնվում են սիրիական կառավարության վերահսկողության տակ, մահանում է ավելի քան 10 բանտարկյալ։ Այս մասին ասվում է Amnesty International-ի զեկույցում։
Ըստ «Մարդու իրավունքների ոլորտում տվյալների վերլուծման խմբի»՝ մոտ 17 723 մարդ սպանվել է Սիրիայի տարածքում՝ ազատազրկման մեջ գտնվելով 2011 թվականի մարտի 15-ից 2015 թվականի դեկտեմբերի 31-ը։ Ինչպես նշում են իրավապաշտպանները՝ թիվը կարող է և ավելին լինել, քանի որ հակամարտության ընթացքում անհետ կորել են տասնյակ հազարավոր մարդիկ։
Amnesty International-ը հարցաքննել է 65 նախկին բանտարկյալի, ովքեր պատմել են «անողորմ» կտտանքների մասին, որոնք սկսվում են բանտերում հայտնվելուց անմիջապես հետո։ Բացի դրանից՝ նրանք պատմել են պահման վատ պայմանների մասին, որոնք ներառում են բանտերի գերբեռնվածություն, սննդի, բուժսպասարկման և սանիտարահիգիենիկ պայմանների պակաս։
Իրավապաշտպանները դիմել են միջազգային հանրությանը, հատկապես ռուսական և ամերիկյան կողմերին, խնդրելով ուշադրություն դարձնել այդ խնդրինմ և համոզել դադարեցնել կտտանքների կիրառումը բանտերում։
