Արարատի մարզի Խաչփար գյուղի շուրջ 600 բնակիչներ մոտ մեկ շաբաթ է՝ խմելու ջրի խնդիր ունեն: Shamshyan.com-իտվյալներով՝ գյուղացիները պատրաստվում են դույլերով Երևան գալ՝ ի նշան բողոքի, ակնկալելով, որ գոնե կառավարության կողմից լուծում կստանա այս խնդիրը:
«Առաջին լրատվական»-ը Խաչփարի համայնքապետից տեղեկացավ, որ «ՀայՋրմուղկոյուղի» ընկերության աշխատակիցների մի խումբ աշխատում է խնդրի լուծման ուղղությամբ: Գյուղապետ Ղազար Մարտիրոսյանն ասաց, որ խնդիրը 15-րդ փողոցում է, որը գտնվում է գյուղի ամենավերջին հատվածում, և շոգի պատճառով դժվարությամբ է հասնում: Բայց որ ընդհանուր առմամբ ջրի խնդիր կա գյուղում՝ Ղազար Մարտիրոսյանը հերքեց:
«Պատճառը չգիտեմ, ես ջրի մասնագետ չեմ: Համատեղ քննարկում ենք, միգուցե ինչ-որ խողովակաշար պետք է փոխվի: Դա մասնագիտական խնդիր է, թե ոնց անենք, որ ջուրը մինչև վերջ գա հասնի: Գյուղում ջուր է մատակարարվում ժամը 8.30-ից մինչև 23.00-ն: Այժմ ջրի քանակը պակասել է, դժգոհություն է առաջացել, մենք էլ ուզում ենք այնպես անել, որ բոլորին հավասար հասնի»,- նշեց գյուղապետը:
Խմելու ջուրն այս համայնք հասնում է Ազատաշենից և բավականին տարածություն է անցնում մինչև բնակիչներին հասնելը: Ներկայում «ՀայՋրմուղկոյուղի» ընկերությունն աշխատանքներ է իրականացնում գյուղում:
Ղազար Մարտիրոսյանը տեղեկացրեց, որ այդ հատվածում ջրագիծն էլ պետք է փոխվի, և խոստացավ, որ մեկ-երկու օրվա ընթացքում խնդիրը կլուծվի: