Վրաստանի վարչապետ Բիձինա Իվանիշվիլին այսօր հատուկ ուղերձում ոստիկանությանն ու դատախազությանը կոչ է արել առանց հստակ հիմնավորման և անհրաժեշտության չձերբակալել երկրի նախագահի թեկնածուների նախընտրական արշավների մասնակիցներին: Այս մասին հայտնում է Novosti Gruziya-ն:
Հերթական նախագահական ընտրությունները Վրաստանում կանցկացվեն հոկտեմբերի 27-ին: Ներկայում ընտրություններին ծրագրում են մասնակցել 4 թեկնածուներ՝ Վրաստանի կրթության ու գիտության նախարար Գեորգի Մերգելաշվիլին ՝ իշխող «Վրացական երազանք» կոալիցիայից, Լեյբորիստական կուսակցության առաջնորդ Շալվա Նատելաշվիլին, խորհրդարանի նախկին խոսնակ, «Ժողովրդավարական շարժում-Միացյալ Վրաստան» կուսակցության առաջնորդ Նինո Բուրջանաձեն, ինչպես նաև «ԵՄ-վրացա-աբխազա-օսեթական միջազգային շարժում հանուն խաղաղության, ժողովրդավարության ու զարգացման» նախագահ Նեստան Կիրտաձեն:
Իվանիշվիլիի խոսքով՝ նախընտրական արշավի և ընտրությունների շրջանում ավելի մեծ առաջնահերթություն է քաղաքական ազատության ապահովումը:
Իվանիշվիլին նշել է, որ միայն ժողովուրդը պետք է որոշի ում վստահել:
Համաձայն Վրաստանի Սահմանադրությունում ընդունված փոփոխությունների՝ հոկտեմբերին ընտրվելիք նախագահի երդմնակալությունից հետո երկրում իշխանությունը փաստացի անցնում է խորհրդարանին ու կառավարությանը: Սահմանադրության նոր մոդելը, որը խորհրդարանն ընդունել է 2010 թվականին, նախատեսում է նախագահի լիազորությունների կրճատում:
