«Առաջին լրատվական»-ի տեղեկություններով՝ նախագահ Սերժ Սարգսյանին որոշակի տեղեկություններ կամ կասկածներ են հասել, որ Վերահսկիչ պալատի նախագահ Իշխան Զաքարյանը վարչապետ դառնալու հույսեր է փայփայել: Դա է եղել նաև պատճառը, որ նա հունիսի 29-ին նախագահականում հրավիրած հայտնի քննարկման ժամանակ այդքան կոպիտ է խոսել Ի. Զաքարյանի հետ:
Իր հերթին ՎՊ նախագահն իր գործունեության հրապարակային հատվածը բավականին աղմկոտ է կազմակերպել հենց այդ մտադրությունների շրջանակում: Ընդ որում, դա վերաբերում է ոչ միայն ՎՊ վերջին հաշվետվությանը: Իշխանական շրջանակներում խոսակցություններ են շրջանառվում, որ Ի. Զաքարյանն այդ ցանկությունը բավականին վաղուց է ունեցել՝ ՎՊ նախագահ նշանակվելուց քիչ անց: Նա իր աշխատանքի բերումով հաճախ է հանդիպել Ս. Սարգսյանին և մինչև վերջին աղմկոտ քննարկումը՝ վայելել է նախագահի բացարձակ վստահությունը: Ս. Սարգսյանը գրեթե «հալած յուղի» տեղ է ընդունել նրա ներկայացրած բացահայտումներն ու փաստարկները: Եվ հենց այդ վստահությունն է Ի. Զաքարյանին համարձակություն և հնարավորություն տվել ՎՊ բոլոր բացահայտումների հրապարակումներն այնպես ներկայացնել, թե իբր ինքն է Հայաստանի տնտեսական կամ պետական միջոցների չարաշահման միակ մտահոգ պաշտոնյան:
Գործնականում պետական բոլոր հիմնարկները մուտք գործելու, դրանց ֆինանսական շրջանառությունը ստուգելու հնարավորությունն է նրա մոտ առաջացրել վարչապետ դառնալու ցանկությունը: Հատկապես այս շրջանում, երբ Հայաստանի գրեթե ողջ քաղաքական դաշտը վարչապետի փոփոխություն է պահանջում, Ի. Զաքարյանը դարձել է այդ պաշտոնին հավակնողներից մեկը: Սակայն նախագահականում տեղի ունեցած հայտնի քննարկումից ու Ս. Սարգսյանի քննադատությունից հետո այդ հույսերն ի չիք են դարձել:
Ազգային ժողովում 2012թ. հաշվետվության ներկայացման ժամանակ նրա այն հայտարարությունը, թե գնումների ոլորտում համակարգային չարաշահումներ են տեղի ունեցել, կամ բյուջեի 701 մլրդ դրամը չարաշահման ռիսկի տակ է, որքան էլ իրական լինի, միաժամանակ, ըստ էության, մեղադրանք էր՝ ուղղված ողջ իշխանություններին: Այդ մեղադրանքը անուղղակիորեն առնչվում է նաև Ս. Սարգսյանին, քանի որ նա է իշխանության ղեկավարը: Ահա թե ինչու Ի. Զաքարյանին առայժմ չի ներում Ս. Սարգսյանը:
Մեր տեղեկությունների համաձայն՝ այժմ Ի. Զաքարյանը փորձում է մեղմել Ս. Սարգսյանի՝ իր նկատմամբ ունեցած դժգոհությունն ու վերականգնել նախկին վստահությունը: Արդեն մամուլում հրապարակումներ են եղել, որ Ս. Սարգսյանը աշնանը՝ նրա պաշտոնավարման ժամկետի ավարտից հետո, նրան չի ցանկանում կրկին առաջադրել ՎՊ նախագահի պաշտոնում: Այսքանից հետո և այս իշխանությունների օրոք նա այլևս չի կարող հավակնել վարչապետի պաշտոնին: Այս պարագայում արդեն Ի. Զաքարյանը փորձում է այնպես անել, որ իրեն գոնե ընդմիշտ չհեռացնեն իշխանությունից, որպեսզի ՎՊ նախագահի պաշտոնից հետո կարողանա այլ պաշտոն ստանալ:
Լուսանկարը՝ Armenpress-ի
