Մի քանի ամիս է, ինչ ԱՄՆ-ից իր ընտանիքի՝ որդու, հարսի ու թոռնիկի հետ միասին ընդմիշտ Հայաստան է վերադարձել դերասանուհի Թամարա Հովհաննիսյանը՝ դերասան Մհեր Մկրտչյանի կինը:
Դերասանուհու ու Մհեր Մկրտչյանի հարաբերությունների մասին այնքան իրարամերժ պատմություններ են հյուսվել, այնքան շատ բան է պատմվել, որ դերասանուհին պարզապես ներկայում անտեղի է համարում այդ խոսակցություններին առանձին-առանձին անդրադառնալը:
Թամարա Հովհաննիսյանը պատրաստվում է բոլորին հուզող պատասխանները տալ ավելի ուշ՝ իր ֆիլմում: «Ծրագրում եմ նաև Մհեր Մկրտչյանի հետ կապված բավական լուրջ նախագծեր»,- խոստովանեց դերասանուհին՝ անկեղծանալով, որ հայրենիք վերադառնալու իր պատճառներից մեկն էլ դա էր:
Բացելով փակագծերը՝ դերասանուհին ասաց, որ մտադիր է ֆիլմ նկարել իր ու Մհեր Մկրտչյանի մասին: «Դա լինելու է երկխոսություն իմ ու իր միջև, ինքն օբյեկտիվն է լինելու: Ես խոսում եմ օբյեկտիվի հետ, երկխոսություն է լինելու»,- ասաց դերասանուհին:
Բացի այդ՝ Թ. Հովհաննիսյանը պատրաստվում է լույս ընծայել մի ալբոմ Մհեր Մկրտչյանի մասին, որտեղ զետեղվելու են իր մոտ գտնվող և երբևէ չհրապարակված նյութերը:
Անդրադառնալով լրատվամիջոցներում ներկայացված պատմություններին՝ նա տարակուսեց, թե ինչպես կարող են վերջիններս խոսել, կարծիք հայտնել՝ առանց որևէ պատկերացում ունենալու իր ու Մհեր Մկրտչյանի հարաբերությունների մասին: «Մակերեսային, սենսացիոն, փող հավաքողի հոգեբանությամբ արված աշխատանքներ են»,- ասաց դերասանուհին: Ինչպես ինքն ասաց, իրեն չեն հուզում, թե ինչ են խոսել կամ խոսում մարդիկ իր մասին. ինքն ունի իր սեփական կարծիքն այդ մասին, քանի որ ինքն արդարանալու, ապացուցելու որևէ բան չունի ինչ-որ մեկին:
Դերասանուհին ԱՄՆ-ից ժամանել է բավական շատ ծրագրերով, պատրաստի սցենարներով, բեմադրությունների նախապատրաստական աշխատանքներով, որոնք ցանկանում է կյանքի կոչել:
Նա հայտնեց, որ վերջին 5 տարում աշխատել է գրական նյութերի վրա՝ սցենարի է վերածել գրող Վարդգես Պետրոսյանի «Կրակե շապիկը» ստեղծագործությունը, դրամատուրգ Լևոն Շանթի «Դերասանուհին» վիպակը:
Դերասանուհին նաև պիես է գրել, որը վերնագրել է «Արի ամուսնանանք»: Ըստ դերասանուհու՝ այն ներկայացնելու է հայ համայնքի կյանքը մի հայ ընտանիքի պատմության միջոցով:
