Իտալիայի նախկին վարչապետ Սիլվիո Բեռլուսկոնիի գլխավոր դաշնակիցներից մեկը մեղադրվում է Ղազախստանի առաջնորդ Նուրսուլթան Նազարբաևին օգնություն ցուցաբերելու մեջ՝ հաղորդում է The Independent-ը:
Ինչպես հիշեցնում է թերթը, մայիսի 29-ին ղազախ հայտնի այլախոհ և BTA բանկի նախկին ղեկավար Մուխթար Աբլյազովի կինն ու աղջիկը ՆԳՆ-ի հրամանով ձերբակալվել և արտաքսվել են Իտալիայից: Այս գերատեսչության ղեկավարն է Անջելինո Ալֆանոն:
Պարբերականը նշում է, որ Ալֆանոն բարձր պաշտոն է զբաղեցնում Բեռլուսկոնիի կուսակցությունում և համարվում է նախկին վարչապետի աջ ձեռքն իտալական կառավարությունում:
Իտալիայի իրավապահ մարմինները արտաքսել են Աբլյազովի կնոջը՝ հայտարարելով, որ նրա անձնագիրը կեղծ է: Սակայն այժմ Հռոմի դատարանը պարզել է, որ Ալմա Աբլյազովայի փաստաթղթերը եղել են կարգին, և հարցականի տակ է դրել արտաքսման օրինականությունը և արագությունը, որով այն իրականացվել է:
Մի շարք իտալացի քաղաքական գործիչներ և լրագրողներ Ալֆանոյին մեղադրել են նրանում, որ նա Աբլյազովի կնոջն ու դստերը Ղազախստան է ուղարկել Բեռլուսկոնիի խնդրանքով, որը Նազարբաևին բնութագրել է որպես «սիրելի ընկերոջ»:
Իտալիայի վարչապետ Էնրիկո Լետան հայտարարել է, որ հրամայել է ներքին հետաքննություն անցկացնել այս հարցով:
Ավելի վաղ հաղորդվել էր, որ Ղազախստանում Աբլյազովին մեղադրում են 5 միլիարդ դոլարի ֆինանսական խախտումների մեջ: Նա հերքում է բոլոր մեղադրանքները՝ հայտարարելով, որ դրանք քաղաքական դրդապատճառներ ունեն:
