«Օգոստոսի 7-ին Թուրքիայում կազմակերպված հանրահավաքը ես կանվանեի շոու՝ կազմակերպված Էրդողանի կողմից։ Դա ավելի շատ նման էր մարդկանց ահաբեկելու հավաքի, որով Էրդողանն ավելի շատ փորձում էր մարդկանց ցույց տալ իր ուժը և ահաբեկել իր քաղաքական հակառակորդներին»,- «Առաջին լրատվական»-ի հետ զրույցում, անդրադառնալով նախօրեին Թուրքիայում կազմակերպված հանրահավքին, ասաց թուրքագետ Հայկ Գաբրիելյանը։
Թուրքագետի խոսքով՝ հանրահավքն իր ուղերձներն է պարունակել՝ ուղղված ներքին և արտաքին լսարանին. «Արտաքին մեսիջները ուղված էին ԱՄՆ-ին և Արևմուտքին՝ ցույց տալու համար, որ Արևմուտքը պարտավոր է հաշվի նստել Էրդողանի հետ»:
Ինչ վերաբերում է հանրահավաքին ընդդիմադիր կուսակցությունների ղեկավարների մասնակցությանը, ապա Հ. Գաբրիելյանի խոսքով՝ «Ազգայնական շարժում» կուսակցության ղեկավարի մասնակցությունը բնական է, քանի որ նրա և Էրդողանի հայացքները բավական մոտ են իրենց ազգայնամոլական բնույթով։ Ուշագրավ է միայն Թուրքիայի խորհրդարանում ներկայացված երկրորդ ընդդիմադիր ուժի Ժողովրդահանրապետական կուսակցության մասնակցությունը հանրահավաքին։ «Մենք գիտենք, որ այդ կուսակցությունը ստեղծվել է հենց Աթաթուրքի կողմից, ով Թուրքիայի հանրապետության հիմնադիրն է։ Իսկ Աթաթուրքի 6 սկզբունքներից մեկն էլ եղել է այն, որ Թուրքիան պետք է լինի աշխարհիկ երկիր, ոչ թե կրոնապետություն։ Ստացվում է, որ ընդդիմադիր ուժի ղեկավարը մասնակցում է մի հանրահավաքի, որն ուղղված է ռազմական հեղաշրջման դեմ, մինչդեռ այդ հեղաշրջումից ամենաշատը հենց ինքն էր շահելու, եթե այն հաջողվեր»,- ասաց թուրքագետը։
Գաբրիելյանի խոսքով՝ հանրահավաքին զինվորականների մասնակցությունը ևս խոսում էր այն մասին, որ հանրահավաքը բեմադրված էր, որով Էրդողանը փորձում էր ցույց տալ, որ զինվորականները նույնպես իրենց կողմնակիցներն են և այլևս կապ չունեն ռազմական հեղաշրջման փորձերի հետ։
Ինչ վերաբերում է ԱՄՆ-Թուրքիա հարաբերություններին, ապա թուրքագետի խոսքով՝ Գյուլենի արտահանձնման պահանջից հետո այդ հարաբերությունները բավականին բարդ են, քանի որ ԱՄՆ հասկանում է, որ արտահանձնումից հետո Գյուլենին լավ ճակատագիր չի սպասում Թուրքիայում։ Դրա համար էլ հավանաբար կընտրվի Գյուլենին երրորդ երկրին հանձնելու և դրանով պատասխանատվությունից ազատվելու տարբերակը։ Հայկ Գաբրիելյանի խոսքով՝ Թուրքիայում Գյուլենին սպասում է ամենախիստ պատիժը՝ մի քանի ցմահ ազատազրկում։ Հնարավոր է նաև վերականգնվի մահապատիժը հենց Գյուլենի համար։
Անդրադառնալով հայ-թուրքական հարաբերությունների վերաբերյալ Ադրբեջանի դիրքորոշմանը՝ Հ. Գաբրիելյանը կարծիք հայտնեց, որ Ադրբեջանը կարող է մեղմել հայ-թուրքական սահմանի բացման հարցում իր դիրքորոշումը:
Առավել մանրամասն՝ տեսանյութում: