«Բռնությամբ հնարավոր չէ արդարություն հաստատել»,- «Առաջին լրատվական»- ի հետ զրույցում ասաց ԲՀԿ խմբակցության ղեկավար Նաիրա Զոհրաբյանը՝ անդրադառնալով դիտարկմանը, որ «Սասնա ծռեր» խմբի գործողության հետ կապված վերջին օրերի իրադարձությունների ընթացքում առաջին անգամ ամրագրվեց, որ ժողովուրդը պաշտպանում է զենքով պայքարողներին:
Ն. Զոհրաբյանի դիտարկմամբ՝ հանրության մի հատված, ըստ էության, լեգիտիմացրեց զենքով հարց լուծելու գործելաոճը: Նրա խոսքով՝ մտահոգիչ է, որ հանրության մի մասի համար ոչ միայն ընդունելի, այլ նաև ողջունելի դարձավ զենքով հարց լուծելու երևույթը:
«Ամենավտանգավոր բանը, որ այսօր մենք կարող ենք արձանագրել, դա հանրության մի հատվածի ծայրաստիճան ռադիկալացումն է, ինչի համար ես ինձ իրավունք չեմ վերապահի մեղադրել այդ մարդկանց, սակայն ես երբևէ չեմ պաշտպանի, և ԲՀԿ-ն ևս չի պաշտպանելու նման մեթոդներով հարցեր լուծելու գործելաոճը:
Ինչքան էլ հասկանամ հուսահատության հասած մարդու ցասումը, ինչքան էլ փորձեմ վերլուծել և արդարացնել, թե ինչի է ընդունակ հայրենասեր մարդը, միևնույն է՝ մարդ սպանելով, պատանդ վերցնելով հնարավոր չէ օրենքի երկիր կառուցել»,- նշեց Ն. Զոհրաբյանը:
Նրա գնահատմամբ՝ այս ամենի մեղավորը ոչ թե հանրության ռադիկալ հատվածն է, այլ իշխանությունը: «Առաջին մեղավորն իշխանությունն է, որովհետև անընդհատ խոստումներով, անընդհատ իմիտացիաներով՝ յուրաքանչյուր հռչակված պայքար իմիտացիաներից այն կողմ չի անցել: Մենք բոլորս պետք է հասկանայինք, որ գալու այդ կրիտիկական պահը, երբ որ զենքով հարց լուծելը լեգիտիմացվելու է:
Իշխանությունը դասեր պիտի քաղեր անցած 25 տարիների ընթացքում, անընդհատ գործել է «մեր դեմ խաղ չկա» սկզբունքը, հետևություններ և քայլեր պետք է արվեին վաղուց:
Մեր երկրում արդեն «Ջինը շշից բաց է թողնվել», եթե իշխանության կողմից կոնկրետ քայլեր չձեռնարկվեն, ամեն օր մենք ունենալու ենք նույն իրավիճակը, առաջիկա ՏԻՄ ընտրությունները ևս վերածվելու են նման գործընթացների»:
Նաիրա Զոհրաբյանի կարծիքով՝ այս իրավիճակից ելքեր գտնելու համար լրջագույն համակարգային փոփոխություններ պետք է իրականացվեն. «Եթե իշխանությունը մեկ- երկու «կիլկիի պիտի փուռը տա» և, ըստ էության, ոչինչ չփոխվի, սա լինելու է վերջի սկիզբը»:
Մանրամասները՝ տեսանյութում:
