Երևանի Ավան և Նոր-Նորք վարչական շրջանների ընդհանուր իրավասության դատարանում 2012-ի դեկտեմբեր ամսից դատում են «Խաչիկյան-2» կամ «Խաչիկյան-դուստր» մասնաճյուղի 4 պատասխանատուների: Կարեն Եղիազարյանը, Ռոբերտ Հակոբյանը, Աշոտ Երեմյանը և Վոլոդիա Բախշինյանը արդարամտորեն չեն բաշխել կամ պարզապես չեն բաշխել Նոր-Նորք համայնքի թոշակառուների կենսաթոշակները: Ավելին, երևի մտքում էլ ասել են` դուք «արխային» մեռեք կամ գնացեք, մենք ձեր փողին տեր ենք: և այդպես 5 տարի շարունակ…
Ըստ մեղադրական եզրակացության` նրանք ՀՀ աշխատանքի և սոցիալական հարցերի նախարարության սոցապահովության պետական ծառայության աշխատակազմի վճարային ծառայության պետի 2002թ. հրամաններով մինչև 2010թ. դեկտեմբերն աշխատել են նույն ծառայության աշխատակազմի վճարումների ծառայության Երևանի «Խորհրդային-1» տարածքային ստորաբաժանումում որպես վճարող-տեսուչներ: Այսինքն, հանդիսանալով նյութական պատասխանատու անձինք և օժտված լինելով կենսաթոշակների վճարման լիազորություններով, իրենց վստահված կենսաթոշակների գումարներից առանձնապես խոշոր չափերի հասնող գումարներ հափշտակելու դիտավորություն են ունեցել և յուրացրել. «սոցապ կվարտետը» տեղեկանալով, որ կենսաթոշակառուները բացակայում են Հայաստանից կամ մահացել են, իսկ սոցապահովության իրենց տարածքային բաժնում տեղյակ չեն այդ մասին, հանգուցյալ կենսաթոշակառուների տվյալները թողել են կենսաթոշակների վճարային ցուցակներում և 2005-2010թթ. ընթացքում կենսաթոշակառուների ստորագրությունները կեղծելով` նրանց անվամբ անհիմն ելքագրել և յուրացրել են առանձնապես խոշոր չափերի` մոտ 28 մլն դրամ գումար: Նախաքննական մարմնի հաշվարկով այդ գումարից առյուծի մասը` 12.573.981 դրամը բաժին է հասել Ռոբերտ Հակոբյանին, 6.556.260 դրամը` Կարեն Եղիազարյանին, 3.992.831մլն-ը` Վոլոդիա Բախշինյանին, 5.688.163 դրամը` Աշոտ Երեմյանին:
Նրանց բոլորին էլ մեղադրանք է առաջադրված առանձնապես խոշոր չափերի յուրացման /քր. օրի 179 հոդ. 3 մաս 1 կետ/ համար, որը նախատեսում է 5-8 տարվա ազատազրկում` գույքի բռնագրավմամբ կամ առանց դրա, ինչպես նաև փաստաթղթեր կեղծելու համար /325 հոդ./, որը նախատեսում է 400.000-ից 800.000 դրամ տուգանք կամ առավելագույնը` 4 տարվա ազատազրկում:
4 ամբաստանյալներից միայն ամենաքիչ «յուրացնողը»` 67-ամյա Վոլոդիա Բախշինյանը կալանավորված չէ:
Այս գործը վստահվել է դատավոր Դավիթ Հարությունյանին` «Կրակեմ Հրաչի» որդուն: Հերթական նիստը հուլիսի 9-ին է, ժամը` 15.00-ին:
Հ.Գ. Հարգելի հետաքրքրասերներ, յուրացումներից բարոյական վնաս կրած տուժողներին դատարանում տեսնելու ակնկալիք չունենաք. մեռելները դատարան չեն գալու, որ իմանաք, թե 1 մեռելից 1 տարում «կվարտետը» որքան օգուտ է ստացել: Բայց մինչև բռնվելը նրանք երևի ասել են` «մեռնեմ Նոր-Նորքի մեռելներին, հորիցս լավ են նայում…»:
