ՄԱԿ-ի 12 անդամ երկրներ դիմել են Անվտանգության խորհրդի՝ պատժամիջոցների հարցերով կոմիտեին՝ խնդրելով դիտարկել Հյուսիսային Կորեայի կողմից բալիստիկ հրթիռների փորձարկումների մասին առկա տվյալները։ Այս մասին հայտնում է RIA Novosti-ն։
«Քանի որ Հյուսիսային Կորեան շարունակում է սպառազինությունների նոր ապակայունացնող համակարգի մշակումը, ՄԱԿ-ի ԱԽ-ն պետք է պատրաստվի պատասխանել հետագա էական միջոցներով»,- ասվում է նամակում, որում նաև համապատասխան քայլերի ձեռնարկման կոչ է պարունակվում։
Հետաքննությունը կարող է օգնել ի հայտ բերելու անձանց և ընկերություններին, որոնք մասնակցել են հրթիռների մշակմանը, ինչը կարող է հանգեցնել նրանց նկատմամբ պատժամիջոցների, այդ թվում՝ վիզաների ստացման գլոբալ սահմանափակմանն ու ակտիվների սառեցմանը։
Նամակի տակ իրենց ստորագրություններն են դրել ԱՄՆ-ի, Ճապոնիայի, Ավստրալիայի, Մեծ Բրիտանիայի, Հարավային Կորեայի, Ֆրանսիայի, Մալայզիայի, Նոր Զելանդիայի, Իսպանիայի, Ուկրաինայի, Ուրուգվայի և Սենեգալի ներկայացուցիչները։
