Ռուսական RIA Novosti լրատվական գործակալությանը տված հարցազրույցում ԵԱՀԿ Մինսկի խմբի ամերիկացի համանախագահ Ջեյմս Ուորլիքը հայտարարել է, որ ԵԱՀԿ Մինսկի խմբի համանախագահները հնարավորություն են փնտրում՝ կազմակերպելու համար Հայաստանի ու Ադրբեջանի նախագահների հերթական համատեղ հանդիպումը:
«Երևանում դիմակայության խաղաղ հանգուցալուծումը մեզ մոտ առաջացնում է թեթևության զգացում: Դիմակայությունը և դրա հետ կապված հասարակական քննարկումները միայն հաստատում են կարևորությունն այն բանի, որ տևական խաղաղությանը հասնելու ճանապարհն անցնում է բանակցային գործընթացի միջով, որն ընդունելի է բոլոր կողմերի համար և տանում է դեպի հակամարտության բազմակողմ կարգավորման:
Ոչ մի որոշում չի կարող բռնի կերպով պարտադրվել կողմերից որևէ մեկին: Խաղաղության գործընթացում հավելյալ առաջընթացի հասնելու համար մենք հնարավորություն ենք փնտրում՝ կազմակերպելու համար Հայաստանի ու Ադրբեջանի նախագահների հերթական համատեղ հանդիպումը»,- ասել է Ուորլիքը:
Նա հայտարարել է, որ Վիեննայի ու Սանկտ Պետերբուրգի հանդիպումները եղել են հաջող՝ նվազեցնելու համար շփման գծի երկայնքով բռնությունները, վերսկսելու համար էական բանակցությունները և առաջ մղելու համար բռնությունների ռիսկը կրճատելու առաջարկը:
«Անհրաժեշտ է շարունակել դրական այդ դինամիկան խաղաղության գործընթացում՝ կազմակերպելով նախագահների հերթական հանդիպում: Համանախագահող երկրները հավատարիմ են նախագահների միջև երկխոսությունը շարունակելու իրենց պարտավորություններին և դիտարկում են մոտ ժամանակներս նրանց հերթական հանդիպման հնարավորությունը»,- նշել է ամերիկացի համանախագահը:
