Կիրակի գիշերը Նիկարագուայի ԶԼՄ-ները հրապարակել են ԿՀՎ նախկին աշխատակից Էդվարդ Սնոուդենի նամակը, որում նա քաղաքական ապաստան է խնդրում: Նա ԱՄՆ-ում հնարավոր չի համարում արդարադատությունը, որտեղ նրան լրտեսության համար կարող են դատապարտել «ցմահ ազատազրկման և նույնիսկ մահապատժի»:
Հունիսի 30-ին նամակի պատճենը հրապարակվել է Radio Ya ռադիոկայանի կայքում: Այն անգլերենով գրվել է Մոսկվայում և հասցեագրվել «Նիկարագուայի Հանրապետության ներկայացուցիչներին»: Նամակի տեքստը նման է Լեհաստանից քաղաքական ապաստան խնդրելու նամակին:
«Ես՝ ԱՄՆ քաղաքացի Էդվարդ Սնոուդենս, ապաստանի խնդրանքով դիմում եմ Նիկարագուայի Հանրապետությանը՝ կապված ԱՄՆ-ի և նրա գործակալների կողմից հետապնդվելու սպառնալիքի հետ, որի պատճառը իմ որոշումն է՝ բարձրաձայնել ԱՄՆ Սահմանադրության, մասնավորապես՝ 4-րդ և 5-րդ ուղղումների, ինչպես նաև ՄԱԿ-ի տարբեր համաձայնագրերի խախտումների մասին: Այս հանգամանքները հաշվի առնելով՝ քիչ հավանական եմ համարում իմ նկատմամբ արդար դատաստանը կամ մինչդատյա պատշաճ վերաբերմունքը. ինձ ցմահ ազատազրկում և նույնիսկ մահ է սպառնում»,- գրել է Սնոուդենը:
Նամակի հեղինակը նշում է, որ այս առումով արդեն կա միջազգային փորձ: Օրինակ՝ Էկվադորի կողմից WikiLeaks-ի հիմնադրին ապաստան տրամադրելը:
Այն մասին, որ Նիկարագուան Սնոուդենին կարող է ապաստան տալ, հայտարարել է երկրի նախագահ Դանիել Օրտեգան: Այդ առնչությամբ պատրաստակամություն են հայտնել նաև Վենեսուելան և Բոլիվիան:
