News Georgia լրատվական գործակալության փոխանցմամբ՝ Վրաստանի էներգետիկայի փոխնախարար Մարիամ Վալիշվիլին հերքել է, թե պետական մակարդակով ստորագրվել է համաձայնագիր, որի համաձայն՝ Վրաստանը Հայաստանի տարածքով կստանա իրանական գազի փորձնական խմբաքանակ:
«Մենք՝ որպես պետություն, Ադրբեջանի հետ պայմանագրից հետո չունենք սոցիալական սեգմենտին գազով ապահովելու խնդիր։ Այնպես որ՝ պետությունը տվյալ փուլում բանակցություններ չի վարի։ Եթե բանակցությունները վարում է մասնավոր անձը, ապա նա պետք է ներկայացնի պայմանագիր, հակառակ դեպքում այդ գազը չի կարող հայտնվել մեր ցանցում։ Սակայն մենք դեռ չունենք նման տեղեկատվություն»,- ասել է նա։
Ավելի վաղ Իրանի նավթարդյունաբերության նախարար Բիջան Զանգանեն Հայաստանի էներգետիկայի ու բնական պաշարների նախարար Լևոն Յոլյանի հետ հանդիպման արդյունքներով հայտարարել էր, որ Իրանը վրացական գնորդներից մեկի հետ ստորագրել է փորձնական պայմանագիր, որի համաձայն՝ 2016 թվականին Հայաստանին մատակարարվող իրանական գազի ոչ մեծ խմբաքանակ նրա տարածքով կուղարկվի Վրաստան:
