Մոլդովայի խորհրդարանում Կոմունիստական կուսակցությունը հանդես է եկել հանրապետության պալատի շենքում (որտեղ անցկացվում են երկրի խորհրդարանի նիստերը) «Արևելյան գործընկերության» երկրների պետությունների ղեկավարների գագաթնաժողով անցկացնելու դեմ: Ինչպես հաղորդում է Regnum-ը` վկայակոչելով Publika TV քիշնևյան հեռուստաալիքը, կոմունիստներն իրենց դժգոհությունն են հայտնել, քանի որ գագաթնաժողովի պատճառով չեղյալ կհայտարարվի Մոլդովայի օրենսդիր մարմնի նիստը:
Կոմունիստ պատգամավոր Յուրի Մունթյանը հայտարարել է, որ շենքը, որտեղ անցկացվում է երկրի խորհրդարանի նիստը, «որոշել են օգտագործել մասնավոր երեկույթների համար»:
«Պատկերացում չունեմ, թե ովքեր են այդ անհաջողակները, սակայն մենք իրավունք ունեք գալու խորհրդարանի նիստին: Եվ կգանք առավոտից» ,- հայտարարել է նա:
Հուլիսի 11-ին Քիշնևում նախատեսվում է անցկացնել «Արևելյան գործընկերության» անդամ պետությունների ղեկավարների, Եվրոպական ժողովրդական կուսակցության անդամների երրորդ գագաթնաժողովը: Միջոցառմանը մասնակցելու համար Քիշնև են նախատեսում ժամանել նաև Հայաստանի նախագահ Սերժ Սարգսյանը և Վրաստանի նախագահ Միխեիլ Սաակաշվիլին:
