«Ինձ համար հստակ է, որ այսօր մեր հայրենիքի մեջ ժողովրդին հասկանալու միակ ձևը ժողովրդի մեջ լինելն է։ Դրա համար էի գնացել հանրահավաքի»,- այսօր լրագրողների հետ հանդիպման ժամանակ ասաց աշխարհահռչակ կինոռեժիսոր Ատոմ Էգոյանի կինը՝ Արսինե Խանջյանը, անդրադառնալով նախօրեին ոստիկանական գործողություններին և իրեն բերման ենթարկելուն:
Նա նշեց, որ մինչ այդ պահը տեղյակ չէր, որ ձերբակալություններ են լինում, ապա ասաց, որ ոստիկանական մեծ մեքենայով իրենց տեղափոխել են ինչ-որ զորամասի տարածք, որը պարզ չէր՝ ոստիկանակա՞ն տարածք էր, թե՞ ռազմական։ Տեղում դիմակավորված անձինք են եղել, որոնք փորձել են ստուգել իր պայուսակը, ճշտել են ինքնությունը։
«Սա զարմանալի, արտառոց դեպք էր: Մարդկանց տանում էին առանց պատճառի, երիտասարդներից ու տարեց մարդկանցից սկսած։ Մարդիկ իրենց համար նստած էին նստարանին, զրուցում էին, բայց նրանց տանում էին ոստիկանները»,- պատմեց Արսինե Խանջյանը։ Նա նաև նշեց, որ երբ այդ զորամասի տարածքում դիմակավորված ոստիկաններից մեկը հարցրել է իր անուն ազգանունը, զարմացած հարցրել է՝ դո՞ւք այստեղ ինչ գործ ունեք։ «Ես էլ պատասխանեցի, որ դո՛ւք պետք է ասեք, թե ես այստեղ ինչ գործ ունեմ։ Հստակ էր, որ այդ պահին ոչ ոք չգիտեր, թե մենք այնտեղ ինչ գործ ունեինք»,- նկատեց Խանջյանը՝ ավելացնելով, որ ինքը չի ընդունել ոստիկանության ներողությունը իրեն պատճառված անհարմարության համար, քանի որ կարծում է, որ այդ ներողությունը պետք էր խնդրել հարյուրավոր բերման ենթարկվածներից։
Արսինե Խանջյանը նաև նշեց, որ շուտով վերադառնալու է Կանադա և իր ձեռքի տեսախցիկով արձանագրում է ամեն ինչ՝ այնտեղի հանրությանը Հայաստանում տեղի ունեցող զարգացումներին տեղյակ պահելու համար։
