Որտեղ էլ որ հեղաշրջումներ տեղի ունենան, եթե դրանք ուղղված են օրենքով ընտրված իշխանությունների դեմ, ապա դրանց թիրախը ժողովուրդը, նրա ապագան և ժողովրդավարությունն է: Նման կարծիք է հայտնել այսօր Թուրքիայի վարչապետ Ռեջեփ Թայիփ Էրդողանը:
«Նրանք, ովքեր հենվում են լրատվամիջոցների և զենքի վրա, չեն կարող ժողովրդավարություն բերել: Ժողովրդի կամքի դեմ հանդես եկողները չեն տարբերվում բռնակալներից: Այո, Մուրսին կարող էր սխալներ գործել: Բայց ո՞վ չի անում դրանք: Բայց դրանց համար պատասխան են տալիս ընտրությունների ժամանակ: Իհարկե, ընտրություններն ամենը չէ: Բայց ոչ ոք իրավունք չունի դրանով քողարկվելով՝ դիմել ոչ ժողովրդավարական մեթոդների»,- ասել է վարչապետը:
Նա կոչ է արել բոլոր երկրներին բաց ու ակնհայտ այդ ամենն ընդունել և հայտարարել է, որ զարմանում է Արևմուտքի վրա: «Արևմուտքը մինչ օրս տեղի ունեցածը հեղաշրջում չի անվանել, այն նորից չանցավ ազնվության քննությունը: Բայց միևնույն ժամանակ ես շնորհավորում են Աֆրիկյան միությանը, որը դադարեցրել է Եգիպտոսի անդամակցությունն իրեն: Այ դա է դիրքորոշումը»,- ասել է Էրդողանը:
Էրդողանը ռազմական հեղաշրջման բոլոր կողմնակիցներին կոչ է արել նայել Թուրքիայի պատմությանը: «Մենք չենք ցանկանում որ նույնը տեղի ունենա այլ երկրներում: Յուրաքանչյուր ռազմական հեղաշրջումից հետո Թուրքիան կորցնում էր զարգացման տասնյակ տարիներ, տնտեսությունը քայքայվում էր: Թուրքիան տեղեկատու է Եգիպտոսի և տարածաշրջանային երկրների համար»,- ընդգծել է Էրդողանը:
