«Առաջին լրատվական»-ի տեղեկություններով՝ հնարավոր է, որ առաջիկայում Վազգեն Խաչիկյանի գործով հարցաքննվի նաև Դաշնակցություն կուսակցության պատգամավոր Աղվան Վարդանյանը: Հիշեցնենք, որ Վ. Խաչիկյանն այժմ ձերբակալված է կենսաթոշակային ոլորտում հայտնի չարաշահումների գործով: Այդ գործը նույնպես բացահայտվեց Վերահսկիչ պալատի միջոցով, համաձայն որի՝ 30-40 հազար մահացած կամ Հայաստանից բացակայող թոշակառուների թոշակները տարիներ շարունակ դուրս էին գրվել և գրպանվել սոցապծառայության պաշտոնյաների կողմից:
Այդ ընթացքում ՀՅԴ-ն կոալիցիայի անդամ էր, և Ա. Վարդանյանն էլ որոշ ժամանակ սոցապ նախարարն էր: Իսկ Սոցիալական ապահովության ծառայությունը, որն այդ ժամանակ ղեկավարում էր Վ. Խաչիկյանը, գտնվում է սոցիալական ապահովության նախարարության ենթակայության ներքո: Կարծիք կա, որ առանց Ա. Վարդանյանի կամ ընդհանրապես՝ նախարարների համաձայնության կամ նրանց բաժին հանելու դժվար թե Վ. Խաչիկյանը նման չարաշահումներ թույլ տար:
Իշխանությունները մինչև այժմ Ա. Վարդանյանին ու ՀՅԴ-ական այլ նախարարների կամ գործարարների չեն անդրադարձել՝ այնպես, ինչպես դա արել են «Բարգավաճ Հայաստան» կուսակցության նկատմամբ՝ համարելով, որ Դաշնակցությունը կոալիցիայից դուրս է եկել գաղափարական հենքի վրա: Որոշ տեղեկությունների համաձայն՝ ՀՅԴ-ի ու Ս. Սարգսյանի միջև նույնիսկ այդ մասին պայմանավորվածություն է եղել, իսկ ՀՅԴ Բյուրոյի ներկայացուցիչ Հրանտ Մարգարյանը մինչև այժմ էլ երբեմն հանդիպում է Ս. Սարգսյանի հետ:
Մեր տեղեկությունների համաձայն, սակայն, ՀՅԴ-ն վերջերս սկսել է խախտել իշխանությունների հետ ունեցած որոշ պայմանավորվածություններ՝ ԲՀԿ-ի ու ընդդիմադիր կուսակցությունների հետ միասին ակտիվորեն լծվելով իշխանություններին քննադատելու, գոյություն ունեցող անարդարությունը, պետական համակարգում եղած չարաշահումներն ու թալանը բարձրաձայնելու գործին: Իշխանություններն էլ որոշել են փոխադարձաբար այդ կուսակցությանը տված իրենց խոստումները խախտել: Վերջին շրջանում քննարկվում է առայժմ գոնե Վ. Խաչիկյանի գործով սոցապ նախկին նախարար Ա. Վարդանյանին հարցաքննության կանչելու հարցը: Վերջինս ժամանակին հնարավորինս օգտվել է պետական միջոցներից:
Չի բացառվում նաև, որ իշխանությունները որոշեն նորից վեր հանել «Պետական աջակցություն ՀՀ մանկական խնամակալական կազմակերպությունների շրջանավարտներին» ծրագրի հետ կապված աղմկոտ բացահայտումները: Հիշեցնենք, որ այս ծրագրի դեպքում էլ ծախսվել էր շուրջ 1.3 մլրդ դրամ, որի դեպքում մանկատան սաների համար նախատեսված 227 բնակարանների փոխարեն ձեռք էր բերվել ընդամենը 135 բնակարան, իսկ ձեռք բերված բնակարաններն էլ չէին համապատասխանում սահմանված չափորոշիչներին:
Իհարկե, այս գործով մի քանի տարի առաջ ձերբակալվեց ծրագիրն իրականացրած «Սոկոլ գրուպ» ընկերության տնօրենը, սակայն դեռ այն ժամանակ էլ տեսակետներ էին շրջանառվում, թե այս չարաշահումը նույնպես չէր կարող տեղի ունենալ առանց նախարար Ա. Վարդանյանի իմացության: Այնպես որ՝ չի բացառվում, որ առաջիկայում իշխանությունները վեր հանեն Ա. Վարդանյանի հետ կապված և մոռացության մատնված գործերը՝ ցույց տալու համար, որ ժամանակին ՀՀԿ-ի հետ միասին թալանել է նաև ՀՅԴ-ն: Այս դեպքում դժվար թե նշանակություն ունենա ՀՅԴ մեկ այլ պատգամավորի՝ Վահան Հովհաննիսյանի այն հայտնի հայտարարությունը, թե Վ. Խաչիկյանն ընդամենը արդարությունն է վերականգնել. եթե մեռածներն ու Հայաստանից բացակայողները կարող են ընտրություններին մասնակցել, ինչո՞ւ չեն կարող նաև թոշակ ստանալ:
