Ադրբեջանական APA լրատվական գործակալության փոխանցմամբ՝ Ադրբեջանի պաշտպանության փոխնախարար, գեներալ լեյտենանտ Քերիմ Վելիևը մեկնաբանել է մի շարք ԶԼՄ-ներում տեղ գտած հրապարակումները, որոնց հեղինակները փորձում են ոչ վաղ անցյալում թուրքական բանակում տեղի ունեցածը շաղկապել Ադրբեջանի զինված ուժերի հետ:
Վելիևն անհեթեթություն է որակել Թուրքիայի դեպքերը Ադրբեջանի զինված ուժերի հետ շաղկապելու փորձերը՝ ընգծելով, որ դրանք չունեն որևէ հիմնավորում, և որ քարոզիչ Ֆեթհուլլահ Գյուլենի կողմնակիցները չեն կարող ազդել Ադրբեջանի զինված ուժերի վրա:
«Նուրսիականների (գյուլենական) կամ արմատական այլ հոսանքների կողմից մեր երկրի զինված ուժերի վրա ազդեցություն ունենալը բացառված է, դրա համար չկա հիմք:
Նման հարցերը գտնվում են զինված ուժերի գերագույն գլխավոր հրամանատար Իլհամ Ալիևի խիստ վերահսկողության ներքո: ՊՆ-ի ղեկավարությունը, հրամանատարությունը, ինչպես նաև անվտանգության համապատասխան մարմինները անհապաղ ու վերջնականապես կկանխեն նմանատիպ ամեն մի փորձ:
Այսօր բանակում անցկացվող գաղափարական-քարոզչական աշխատանքը, պետականության ավանդույթների պահպանումն ու գերագույն գլխավոր հրամանատարին հավատարիմ լինելը հնարավորություն են տալիս զինված ուժերը հաջողությամբ պաշտպանել արտաքին ու ներքին արմատական ողջ ազդեցությունից:
Ինչ վերաբերում է Ադրբեջանի զինված ուժերում թուրք մասնագետների ծառայելուն և ռազմական գործեր դասավանդելուն, ցանկանում եմ հայտնել, որ 2000 թվականից Թուրքիան ներկայացնող հրահանգիչներն ու դասավանդողները չեն մասնակցում մեր զինվորականների նախապատրաստությանը:
Մեր զինծառայողները, որոնք սովորում են եղբայրական Թուրքիայում, այդ թվում նաև այլ երկրներում, մշտապես շփման մեջ են ռազմական կցորդի ապարատի, այդ երկրներում դեսպանատների հետ:
Նրանց գործունեությունը մշտապես վերահսկողության տակ է: Այդ պատճառով էլ, երբ խոսում են Թուրքիայի վերջին իրադարձությունների մասին, հիմքեր չկան հիշատակելու ադրբեջանցի կուրսանտների անունները»,- ասել է նա:
Հիշեցնենք, որ սրանից առաջ հաղորդվել էր, թե Թուրքիայում ռազմական հեղաշրջման փորձին մասնակցելու համար կալանավորվել է Ադրբեջանում Թուրքիայի նախկին ռազմական կցորդ, կորպուսի գեներալ Հասան Նևզաթ Թաշդելերը:
