Արմավիրի մարզի Դաշտիկ գյուղի միջնակարգ դպրոցի տնօրեն Գնել Ռոստոմյանին ազատել են աշխատանքից, քանի որ կասկածել են Հանրապետական կուսակցությանը լավ չծառայելու մեջ: Այս մասին այսօր լրագրողների հետ հանդիպմանն ասաց ինքը՝ տնօրենը:
Նա նշեց, որ դեռևս խորհրդարանական ընտրություններից առաջ նրան կասկածել են ոչ թե ՀՀԿ-ական թեկնածուին, այլ նույն ընտրատարածքում առաջադրված իր համադասարանցուն՝ Հակոբ Հակոբյանին պաշտպանելու մեջ:
«Ես դեռ այն ժամանակ ասացի, որ ես Հանրապետական կուսակցության անդամ եմ, ինչպե՞ս կարող եմ Սեյրան Սարոյանին չպաշտպանել, բայց չհավատացին:
Հետագայում նախագահական ընտրություններից առաջ մարզպետ Աշոտ Ղահրամանյանն ինձ կանչեց և ասաց՝ կոլեկտիվդ քանի՞ հոգուց է բաղկացած, ասացի՝ քսան, ասացին՝ քանի՞սն են Հանրապետական, ասացի՝ տասնհինգը, ասաց՝ բա ինչո՞ւ ոչ բոլորը, ասացի՝ դե, մեծամասնությունն են, բայց չհավատաց»:
«Առաջին լրատվական»-ի այն հարցին, թե փաստորեն՝ դպրոցն օգտագործել է Հանրապետական կուսակցությանը ծառայելու համար, արդեն նախկին տնօրենն ասաց. «Ոչ, մենք ուղղակի կոլեկտիվով նստել զրուցել ենք, ես աշակերտների, ծնողների մոտ ոչինչ չեմ ասել»:
Այն դիտարկմանը՝ բա էլ ինչպե՞ս է ծառայել Հանրապետական կուսակցությանը, Գնել Ռոստոմյանն ասաց. «Անմնացորդ և քրտնաջան»:
Ի դեպ, նույն դպրոցի տնօրեն են նշանակել ոմն Սուսաննա Նազարյանի, ով Գնել Ռոստոմյանի խոսքով՝ եղել է Էջմիածնի թիվ երկու ավագ դպրոցի տնօրեն, սակայն իր պարտականությունները չարաշահելու համար ԿԳ նախարար Արմեն Աշոտյանի հրամանով ազատվել է աշխատանքից:
Այն հարցին, թե՝ շարունակելո՞ւ է այսուհետ ծառայել Հանրապետական կուսակցությանը, Գնել Ռոստոմյանն ասաց. «Ես Հանրապետական կուսակցության հնաբնակներից եմ և այո, շարունակելու եմ մնալ նույն կուսակցության անդամ, սակայն այստեղ են սողոսկել տկարամիտ սողուններ, և ինչու չէ՝ նաև ես ու մյուսները պետք է սկսենք կուսակցությունը մաքրել նրանցից»:
