Արագածոտնի մարզի Դավթաշեն գյուղում հունիսի 27-ից արձանագրվել էին աղիքային խանգարման դեպքեր: Գյուղում անցկացված համաճարակաբանական հետազոտությունների արդյունքում պարզվել է, որ թունավորումը եղել է ջրից, որի հետևանքով տուժել էր շուրջ 79 մարդ:
«Առաջին լրատվական»-ը զրուցեց գյուղապետ Գրիգոր Վարդանյանի հետ, ով տեղեկացրեց, որ բակային համայցերը դեռևս շարունակվում են, նոր դեպքեր չեն գրանցվել, իսկ հիվանդները լավանում են:
Կապվեցինք նաև Թալինի բժշկական կենտրոնի հետ, որտեղից մեզ տեղեկացրին, որ Դավթաշեն գյուղից հիվանդանոցում մարդիկ չկան, իսկ հիվանդներն արդեն լավ են զգում իրենց:
Մեզ հետ զրույցում գյուղապետն ասաց, որ ջրամբարը ստուգվել է, ոչինչ չի հայտնաբերվել, հիմա պետք է ստուգել այն ուղղությունները, որոնք հոսում են դեպի ջրամբար:
Գյուղապետի հետ համաձայն չեն համագյուղացիները, ովքեր ասում են, որ գարնանը, երբ ծորակը բացում են, պղտոր ջուր է գալիս։ «Ջրամբարի ջուրը մաքուր չի, դրանից էլ թունավորումներ են լինում»,- ասաց համագյուղացիներից մեկը:
Այնուամենայիվ, առաջիկա օրերին գյուղում կանցկացվեն ջրի հետազոտություններ, որից հետո գյուղապետը խոստացել է դիմել համապատասխան մարմիններին՝ հարցը լուծելու համար: