Այսօր կառավարության նիստի սկզբում վարչապետ Տիգրան Սարգսյանը դարձյալ անդրադարձավ Վերահսկիչ պալատի բացահայտումներին: «Եկել է պատասխան տալու ժամանակը»,- հայտարարեց Տիգրան Սարգսյանը՝ նշելով, որ ֆինանսների նախարարության համապատասխան ստորաբաժանումները արդեն դիտարկումներ են արել տարբեր գերատեսչություններում:
«Լինելու ենք չափազանց խիստ»,- ասաց վարչապետը՝ հորդորելով կառավարության ներկայացուցիչներին այսուհետ իրենց բնագավառներում Վերահսկիչ պալատի բոլոր բացահայտումների վերաբերյալ նյութերը ուղարկել իրավապահ մարմիններին և արդյունքները ներկայացնել հրապարակայնորեն:
Վարչապետը նաև ասաց, որ կառավարության հաջորդ նիստում ներկայացվելու է ոլորտ առ ոլորտ Վերահսկիչ պալատի բացահայտումներն ու դրա հետևանքները:
