ԱՄՆ Պետդեպին կից Միջազգային տեղեկատվական ծրագրերի բյուրոն ավելի քան 630 հազար դոլար է ծախսել Facebook սոցցանցում իր էջերի համար Like-եր գնելու վրա: 2011-2013-ի մարտին անցկացված բաժանորդների ընդլայնման արշավի արդյունքները գերատեսչության գլխավոր տեսուչի խոստովանությամբ՝ գոհացնող չեն: Նա իր զեկույցում եկել է այն եզրակացության, որ Պետդեպն իզուր է ծախսել հարկատուների գումարները: Այս մասին հայտնում է Washington Examiner-ը:
Ավելի քան կես միլիոն դոլար ծախսելով՝ Պետդեպը Facebook-ում իր անգլալեզու էջերի բաժանորդների թիվը ընդլայնել է՝ 100 հազարից հասցնելով 2 միլիոնի: Այլ լեզուներով էջերի լսարանը հասցվել է 450 հազարի: Այդ օգտատերերը եղել են «ռոբոտներ», այլ ոչ իրական մարդիկ: Չնայած բաժանորդների վիթխարի թվին՝ նրանց ընդամենը 2 տոկոսն է ակտիվորեն Like-եր տվել նյութերին, քննարկումներ իրականացրել ու տարածել դրանք:
Պետդեպի խնդիրներից մեկը համապատասխան լսարան որսալու ռազմավարության բացակայությունն է:
Գլխավոր տեսուչը նշել է, որ գերատեսչությունը ավելի քան 150 օգտահաշիվներ ունի սոցիալական մեդիայում, որոնք գործում են չհամաձայնեցված և հաճախ հատվում են միմյանց:
