Բյուջեի գումարները չեն լափվում: Այս մասին այսօր ՀՀ կառավարությունում լրագրողների հետ հանդիպման ժամանակ ասաց ՀՀ աշխատանքի և սոցիալական հարցերի նախարար Արտեմ Ասատրյանը՝ խոսելով ՎՊ հաշվետվության և ոլորտին առնչվող ՎՊ նախագահ Իշխան Զաքարյանի գնահատականների մասին:
Նախարարը նախ խոսեց այն ուղղությունների մասին, որոնք սոցիալական պաշտպանության ոլորտում արձանագրել էր ՎՊ-ն: Ըստ նրա՝ կատարվել են կենսաթոշակների, նպաստների տրամադրման գործընթացների և տարեցների շուրջօրյա խնամքի ծառայությունների, երեխաների գիշերօթիկներում խնամքի վերաբերյալ վերահսկողական աշխատանքներ: Նախարարի հավաստիացմամբ՝ բոլոր այս ուղղություններով իրականացվել են ստուգումներ և բարեփոխումներ:
Նրա խոսքով՝ միայն գնումների գործընթացներում են ընթացակարգային խախտումներ եղել՝ կազմակերպությունները, որոնք մասնակցել են այդ գործընթացներին, հնարավոր է նաև իրավունք չեն ունեցել մասնակցելու դրանց, որոշակի ժամկետներ են խախտվել, որոնց հետ կապված ՎՊ դիտարկումների հետ համաձայն է: Նա նշեց, որ 2012թ. նոյեմբեր ամսին զգալիորեն կանոնակարգել են այդ գործընթացները և ամենախնդրահարույց հարցերը: «Ընդունում եմ ՎՊ կողմից արձանագրված դրական գործընթացները»,- ասաց նախարարը:
Նա նշեց, որ համաձայն չէ այն գնահատականների հետ, թե պետբյուջեի միջոցները լափվում են: «Սոցպաշտպանությանը բյուջեից հատկացվում է 280 մլրդ դրամ, աշխատավարձերը կազմում են 300 մլրդ դրամ, և այն, ինչ ներկայացրեցի, որ սոցիալական պաշտպանության ոլորտում չեն արձանագրվել խախտումներ, նշանակում է, որ չեմ կարող համաձայնել այդ գնահատականի հետ: Արդեն բոլոր պատասխանատուները, որոնք գնումների գործընթացը կազմակերպել են և եղել են պատասխանատուներ, կրել են կարգապահական տույժեր, նկատողություններ, պետությանը հասցված վնաս չի արձանագրվել•:
Լուսանկարը՝ PanARMENIAN Photo-ի
