Թուրքական Dünya Bülteni կայքի փոխանցմամբ, թուրքական Metropoll ռազմավարական ու սոցիալական հետազոտությունների կենտրոնը մերձավորարևելյան զարգացումների կապակցությամբ հարցախույզ է անցկացրել երկրի 81 նահանգներից 31-ում: Դրան մասնակցել է 1538 մարդ:
Նրանց 59 տոկոսը կարծում է, թե արաբական երկրներում ծագած ժողովրդական հուզումների հետևում կանգնած է Արևմուտքը, մոտ 50 տոկոսը հուսով է, որ Մերձավոր Արևելքում կհաստատվի ժողովրդավարություն: 42 տոկոսը համաձայն չէ դրա հետ:
Սիրիական զարգացումների հետ կապված` մասնակիցների 47 տոկոսն ակնկալում է սիրիական ռեժմի փոփոխություն, 44 տոկոսի կարծիքով` Թուրքիան պետք է միջամտի Սիրիայում կայունության ապահովման հարցում, 2/3-ն էլ վստահ է, որ սիրիական զարգացումները բացասականորեն են ազդում Թուրքիայի վրա:
Հիշեցնենք, որ Թուրքիայի վարչապետ էրդողանի կառավարությունը ժամանակին զգալի ջանքեր է գործադրել Սիրիայի հետ հարաբերությունները կարգավորելու համար, ինչի արդյունքում Թուրքիան շուտով կարող է տիրապետող դիրքեր գրավել սիրիական տնտեսությունում:
Թուրքիային ձեռնտու չէ Ասադի վարչակարգի տապալումը, ինչի համար էլ թուրքական կողմն Ասադին շարունակ կոչ է անում բարեփոխումներ իրականացնել:
Ի դեպ, 1990-ական թվականների վերջին երկու երկրները գտնվում էին պատերազմի նախաշեմին, քանի որ Սիրիան շարունակ աջակցում էր Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) զինյալներին:
