Գերմանիայի իշխանությունները սկսում են վերականգնել իրենց հարաբերությունները Ռուսաստանի հետ մինչև այն մակարդակ, ինչպիսին դրանք եղել են Գերհարդ Շրյոդերի օրոք, որը կանցլերն է եղել 1998-2005 թթ.: Այսպիսի եզրակացություններով հոդված է հրապարակել Foreign Policy ամսագիրը:
«Անգելա Մերկելը նախկինի պես Գերմանիայի կանցլերն է, բայց նրա նախորդի ազդեցությունն աճում է: Դա կանվանենք «շրյոդերիզմ»: Այդ գաղափարի համաձայն՝ Գերմանիան պետք է «հատուկ հարաբերություններ» ունենա Ռուսաստանի հետ և անի հնարավոր ամեն ինչ՝ դրանք պահպանելու համար, անկախ հենց Ռուսաստանի գործողություններից»,- ասվում է ԱՄՆ-ում Մարշալի գերմանական հիմնադրամի վերլուծաբան Հանս Քանդնենիի հոդվածում:
Որպես «Շրյոդերիզմի» գլխավոր կողմնակիցներ փորձագետը նշում է Գերմանիայի ԱԳՆ ղեկավար Ֆրանկ-Վալտեր Շտայնմայերին, փոխկանցլեր Զիգմար Գաբրիելին: Նրանց համար «Ռուսաստանի հետ հարաբերությունների նորմալացումը մնում է երկարաժամկետ նպատակ, նույնիսկ եթե դա չի կարող անմիջապես տեղի ունենալ»,- նշվում է հոդվածում: