ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկը լրագրողներին ասել է, որ անհրաժեշտ է պարզել այս շաբաթ ԱՄՆ-ում ոստիկանների կողմից աֆրոամերիկացիների սպանությունների հանգամանքները և հասկանալ՝ արդյոք այդ սպանությունները միտում ունե՞ն: Այս մասին հայտնում է TASS-ը:
Հուլիսի 6-ին ԱՄՆ Մինեսոտա նահանգում ոստիկանը կրակելով սպանել է 32-ամյա Ֆիլանդո Կաստիլեին նրա ավտոմեքենայի ղեկին, որում եղել են նաև կին և երեխա: Մեկ օր առաջ Լուիզիանա նահանգում երկու ոստիկաններ ձերբակալության ժամանակ սպանել են 37-ամյա Էլթոն Սթերլինգին: Սպանությունների տեսագրություններն ավելի ուշ ականատեսները հրապարակել են համացանցում: Երկու սպանությունները բողոքի զանգվածային ալիք են բարձրացրել, որոնց մասնակիցները պահանջել են վերջ դնել ոստիկանական կամայականությանը:
«Առաջին հերթին մենք ցավակցում ենք այդ սպանությունների զոհերի ընտանիքներին: Կարծում եմ՝ ցանկացածը, ով տեսել է այդ տեսագրությունները, (կհամաձայնվի, որ) դրանք, մեղմ ասած, ծայրահեղ մտահոգիչ են: Մենք հույս ունենք, որ այդ դեպքերից յուրաքանչյուրը մանրամասն կհետաքննվի՝ պարզելու համար, թե ինչ է տեղի ունեցել, ինչպես նաև պարզելու՝ արդյոք դրանում ինչ-որ միտում կա՞»,- ասել է ՄԱԿ-ի գլխավոր քարտուղարի պաշտոնական ներկայացուցիչը:
