Volkswagen ավտոկոնցեռնը ԱՄՆ Կալիֆոռնիա նահանգին 86 մլն դոլար կվճարի սկանդալի պատճառով՝ կապված վնասակար արտանետումների մակարդակը ոչ ճիշտ որոշող ծրագրային ապահովման թերությունների հետ: Այս մասին հայտնում է Reuters-ը:
Ավելի վաղ հաղորդվում էր, որ Volkswagen-ը 14,7 մլրդ դոլար կուղղի ԱՄՆ-ում «դիզելային» սկանդալի կարգավորման համար: Յուրաքանչյուր հաճախորդին ավտոարտադրողը կվճարի 5,1-10 հազար դոլար, ինչպես նաև 10 մլրդ դոլարով կվերանորոգի կամ հետ կգնի մոտ 475 հազար ավտոմեքենա:
Լրացուցիչ գումարի մեծ մասը՝ 76 մլն դոլարը, կուղղվի նահանգի՝ հետաքննության հետ կապված ծախսերը ծածկելու համար: Մնացած 10 մլն դոլարը որպես գրանտ կուղղվի հաստատություններին և համալսարաններին՝ տեխնոլոգիաների զարգացման համար, որոնք հնարավորություն են տալիս պարզել ծրագրային ապահովումների աշխատանքի թերությունները:
Volkswagen-ի ներկայացուցիչներից մեկնաբանություն չի ստացվել:
Volkswagen-ը սկանդալի կենտրոնում է հայտնվել մեքենաների վրա ծրագրային ապահովման հայտնաբերումից հետո, որը թույլ է տալիս շրջանցել ԱՄՆ էկոլոգիական խիստ նորմերը: Ավտոհսկայի նկատմամբ հետաքննություններ են սկսվել Եվրոպայի և Ասիայի մի շարք երկրներում:
