Իտալիայում հասունանում է քաղաքական և տնտեսական ճգնաժամ, որը Brexit-ի ֆոնին գրեթե ոչ ոք չի նկատում։ Այս մասին գրում է Business Insider-ը։
«Իտալիան ահա-ահա կմասնատի Եվրոպան, սակայն երկրում հասունացող քաղաքական և տնտեսական ճգնաժամը գրեթե ոչ ոք չի նկատում»,- գրում է պարբերականը։
Բոլորն ակնդետ հետևում են բրիտանական հանրաքվեի հետևանքներին, որոնք կարող են արմատապես ազդել ԵՄ-ի տնտեսության և քաղաքականության վրա։ «Սակայն եթե ուշադրություն դարձնեք տնտեսական վիճակագրության, բանկային խնդիրների և Իտալիայում առաջիկա սահմանադրական հանրաքվեի վրա, կտեսնեք, որ դա դանդաղ գործողության ռումբ է»,- ասվում է հոդվածում։
Հոկտեմբերին Իտալիայում կանցկացվի սահմանադրական հանրաքվե, որը ոչ պակաս կարևոր է, քան Brexit-ը։ Հանրաքվեի արդյունքները կարող են լրջորեն ազդել երկրում իրավիճակի և ողջ Եվրոպայի վրա։
Եթե իտալացիները կողմ քվեարկեն, վարչապետ Մատեո Ռենցիին կհաջողվի կայունացնել քաղաքական իրավիճակը երկրում և խթանել օրենքները՝ ուղղված Իտալիայի տնտեսական մրցունակության բարձրացմանը։ Եթե նրանք դեմ քվերակեն, մեծ է հավանականությունը, որ Ռենցիի կառավարությունը կփլուզվի, և դա կհանգեցնի քաղաքական քաոսի, ինչպիսին չի եղել երկրում Սիլվիո Բեռլուսկոնիի հրաժարականի ժամանակներից։
