Հուլիսի 6-ին Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Մարսելի համազգային դպրոցի եւ Փարիզի «Դպրոցասէր» վարժարանի թուով 26 աշակերտների` ուղեկցութեամբ ֆրանսիաբնակ ազգային բարերար Սարգիս Պետոյեանի:
Ամենայն Հայոց Կաթողիկոսն ուրախութիւն յայտնեց Ֆրանսիայում գործող այս երկու հայկական դպրոցների աշակերտների` Հայրենիք եւ Մայր Աթոռ Ս. Էջմիածին կատարուած այցի առիթով: Նորին Սրբութիւնն իր գնահատանքը յայտնեց բոլոր նրանց, ովքեր մաս եւ բաժին ունեն աշակերտների կրթութեան եւ դաստիարակութեան գործում եւ նպաստում են նրանց ազգային, հայրենասիրական նկարագրի կերտմանը:
Անդրադառնալով հայեցի դաստիարակութեան եւ հայրենասիրութեան կարեւորութեանը` Նորին Սրբութիւնը վստահութիւն յայտնեց, որ աշակերտները, գտնուելով Հայաստանում, շատ լաւ հնարաւորութիւն ունեն մօտիկից հաղորդակից լինելու Հայրենիքի իրականութեանը եւ ազգային-հոգեւոր հարուստ ժառանգութեանը:
«Հայրենիքը երաշխիքն ու ապահովութիւնն է հայ ժողովրդի յաւէրժ գոյութեան: Անհայրենիք անձը նման է մէկին, ով ծնողներ չունի, իսկ Հայրենիքի զաւակը մշտապէս պաշտպանուած է, որովհետեւ Հայրենիքը պատրաստ է հովանաւորելու, իր գիրկը բանալու սեփական զաւակների առջեւ: Ազգային պատկանելութեան առումով Հայրենիքն ազգի զաւակի կենսագրութիւնն է», – ընդգծեց Ամենայն Հայոց Կաթողիկոսը` պատգամելով միշտ արժեւորել Հայրենիքը եւ կապուած մնալ նրան:
Իր հայրապետական պատգամը եւ օրհնութիւնը փոխանցելով աշակերտներին` Նորին Սրբութիւնը յորդորեց, որ ամէն ջանք ի գործ դնեն` օրինակելի ու յաջողուած հայորդիներ լինելու եւ բարի օրինակ ծառայելու գալիք սերունդների համար: Այս առիթով Վեհափառ Հայրապետը նաեւ պատանիներին պատգամեց արդիւնաւէտօրէն օգտագործել իրենց ուսումնառութեան տարիները, որպէսզի ապագայում, իրենց առջեւ ունենալով տիար Սարգիս Պետոյեանի բարի օրինակը, կարողանան օգտակար ծառայութիւն բերել հայոց ազգին, իրենց երկրին եւ Հայրենիքին:
Հանդիպմանն աշակերտներից երկուսն ասմունքեցին Ամենայն Հայոց Կաթողիկոսի առջեւ:
Վերջում Նորին Սրբութիւնը պատասխանեց աշակերտներին եւ ուսուցիչներին հետաքրքրող հարցերին, որոնք վերաբերւում էին Հռոմի Սրբազան Քահանայապետ Ֆրանցիսկոս Պապի` Հայաստան կատարուած այցին, Հայ Եկեղեցու առաքելութեանը եւ ներկայիս գործունէութեանը:
