Ռուս-թուրքական հարաբերությունների կարգավորումն անհրաժեշտ է Մոսկվային և Անկարային առաջին հերթին հակաարևմտյան բնույթի միասնություն ստեղծելու նպատակով՝ կարծում է ռուսաստանցի քաղաքագետ, Պրահայի «Эхо Кавказа» լրատվական ծառայության քաղաքական վերլուծաբան Վադիմ Դուբնովը:
Վերլուծաբանի խոսքով՝ իհարկե, կան ոլորտներ, որտեղ Թուրքիան և Ռուսաստանը կարող են օբյեկտիվորեն սերտացնել հարաբերությունները, բայց գլխավորն այն է, որ դա կլինի հակաարևմտյան հիմքի վրա:
«Կարծում եմ՝ հակաարևմտյան վեկտորներն այսօր շատ կարևոր են և՛ Անկարայի, և՛ Մոսկվայի համար: Ռուսաստանի և Թուրքիայի մերձեցումն առաջին հերթին քայլ է՝ ուղղված Արևմուտքի հետ բանավեճում իրենց դիրքերը փրկելուն և ամրապնդելուն: Նրանք ունեն մեկ ընդհանուր օպոնենտ (ոչ հակառակորդ կամ թշնամի), և Էրդողանին պետք էր վերադառնալ Ռուսաստանի հետ համագործակցության՝ հանուն Արևմուտքի հետ այդ բանավեճի: Մյուս գործոնները՝ գազ, տուրիզմ և այլն, նույնպես կարևոր են, բայց դրանք երկրորդական են: Առաջնայինն այն է, որ Թուրքիան և Ռուսաստանն այսօր անհրաժեշտ են միմյանց հակաարևմտյան բնույթի միասնություն ստեղծելու համար»,- ասաց Վադիմ Դուբնովը «Առաջին լրատվական»-ի հետ զրույցում:
