Միլիարդատեր Դոնալդ Թրամփը, ով հավակնում է Հանրապետական կուսակցությունից ԱՄՆ նախագահի պաշտոնում առաջադրման, կարծում է, որ ԶԼՄ-ները թիրախավորված փորձում են իրեն ներկայացնել որպես հակասեմական։ Համապատասխան հայտարարությունը տեղադրվել է գործարարի թվիթերյան միկրոբլոգում։
Հերթական աղմկալի սկանդալի պատճառ է դարձել այն, որ միլիարդատերն անցած շաբաթվա վերջին հրապարակել էր նույն սոցցանցում սադրիչ կոլաժ. նա Հիլարի Քլինթոնի նկարը տեղավորել էր 100 դոլարանոց թղթադրամների ֆոնին, որտեղ վեցթևանի աստղի վրա գրել էր՝ «Ամենակոռումպացված թեկնածուն»։
Հանրապետականների հակառակորդները հայտարարել էին, որ նա այդ կերպ հրեաներին կապել է կոռուպցիայի հետ, և մեղադրել էին գործարարին հակասեմականության համար։
«Անազնիվ ԶԼՄ-ներն անում են ամեն բան՝ ներկայացնելու իրավիճակն այնպես, ասես Twitter-ի հրապարակման մեջ պատկերված է Դավթի աստղը, այլ ոչ թե շերիֆի աստղ կամ սովորական աստղ»,- ասել է նա։
Նշենք, որ քննադատությունների տարափից հետո վեցթևանի աստղը փոխարինվել էր շրջանակով։
