Չինացիներին օրինական կարգով պարտավորեցրել են տարեց հարազատների մասին հոգ տանել և նրանց նկատմամբ անփութություն չդրսևորել: Ինչպես հայտնում է «Ժենմին ժիբաո» թերթը, «Տարեց մարդկանց իրավունքների ու շահերի պաշտպանության մասին օրենքի» համապատասխան խմբագրումը Չինաստանում ուժի մեջ է մտել 2013-ի հուլիսի 1-ին:
Օրենքը, մասնավորապես, նախատեսում է, որ առանձին ապրող հարազատները հաճախ այցելեն տարեցներին: Իրենց հերթին, գործատուները պարտավոր են աշխատողներին դրա համար անհրաժեշտ արձակուրդ հատկացնել: Բացի այդ, երկրում սահմանվել է Տարեցների օր, որը կնշվի աշնանը:
Նոր նորմերի սահմանումը կապված է Չինաստանում տարեցների անշեղորեն աճող թվի հետ: 2010-ին նրանց թիվը կազմել է 178 մլն, իսկ 2025-ին սպասվում է, որ այն կհասնի 487 մլն-ի։ Հարազատները նրանց մասին քիչ են հոգ տանում: Սոցիոլոգները մատնանշում են քաղաքներում ու գյուղերում «դատարկ բույնի» էֆեկտի տարածումը: 50 տոկոս ընտանիքների երեխաներն առանձին են ապրում ծնողներից:
