Ի տարբերություն մյուս դատարանների, Վճռաբեկ դատարանի դատավորներն առավել համեստ են՝ բարձրաստիճան պաշտոնատար անձանց էթիկայի հանձնաժողովի կայքում հայտարարագրված եկամուտներով ու դրամական միջոցներով:
Չորս ամենահարուստ տղամարդ դատավորներն են ՀՀ վճռաբեկ դատարանի քրեական պալատի նախագահ Դավիթ Ավետիսյանը, քաղաքացիական և վարչական պալատի դատավոր Սուրեն Անտոնյանը, նույն պալատից Գոռ Հակոբյանն ու Արտակ Բարսեղյանը:
ՀՀ վճռաբեկ դատարանի քրեական պալատի նախագահ Դավիթ Ավետիսյանը 2011թ.-ի վերջում հայտարարագրել է 25 մլն դրամ, 3 հազար եվրո ու 24 հազար դոլար, 2012թ.-ին՝ 35 մլն դրամ, 3 հազար եվրո ու 14 հազար դոլար: Գնալով պարոն Ավետիսյանի դրամական միջոցներն ավելացել են, 2015թ. վերջում նա ունեցել է 42 մլն դրամ, 8 հազար եվրո ու 26 հազար դոլար:
2011 և 2012 թվականներին պարոն Ավետիսյանը նաև ունեցել է այլ եկամտի աղբյուրներ՝ ստանալով շուրջ 700 հազար դրամ:
Աշխատավարձը տարվա ընթացքում կազմում է 18 մլն դրամ:
Դավիթ Ավետիսյանի կինը՝ Մանուշակ Ստեփանյանը 2011թ. վերջում գնել է 47 մլն դրամ արժողությամբ բնակարան և երկու ավտոտնակ՝ 4,8 մլն և 5,3 մլն դրամով: Հայտարարագրից տեղեկանում ենք, որ նա 5 մլն դրամով գույք է վաճառել նույն տարվա ընթացքում, ստանում է կենսաթոշակ՝ տարվա կտրվածքով 174 հազար դրամի, ինչպես նաև աշխատավարձ՝ 714 հազար դրամ չափով: 2012թ. նա նույնպես այլ եկամտի աղբյուրներ է ունեցել, հետագա տարիներին ոչինչ չկա հայտարարագրված:
Դրամական միջոցները 2015թ. կազմել են 14 մլն դրամ:
![IMG_9807[1] (1)](http://iravaban.net/wp-content/uploads/2016/07/IMG_98071-1.jpg)
Նույն դատարանի քաղաքացիական և վարչական պալատի դատավոր Սուրեն Անտոնյանը 2015թ. վերջում ունեցել է 57 հազար ԱՄՆ դոլար, 4,5 մլն դրամ ու 2000 եվրո: Դատավորի աշխատավարձը հարկային տարում կազմել է 11 մլն դրամ:
Պարոն Անտոնյանը 2011, 2012 և 2013թ.-ին եկամուտներ է ունեցել տրված փոխառություններից (վարկերից), բայց դրանք խոշոր չափի չեն եղել՝ տարեկան 100-250 դոլարի սահմաններում: Մինչդետ դատավորի կնոջ Ադրինե Գրիգորյանի՝ ստացած տոկոսները ավելի բարձր են, 2011թ. նա ստացել է 557 հազար դրամ, հաջորդ երեք տարիներին այդ գումարից ավելի, իսկ 2015թ.-ին 417 հազար դրամի չափով:
Դատավորի կինը ի թիվս եկամտային տարբեր աղբյուրների, 2015թ. 25 մլն դրամ փոխառություն է հանձնել: Նույն տարվա վերջում նրա դրամական միջոցները կազմել են 4,8 մլն դրամ ու 92 հազար դոլար:
Մյուս դատավորը՝ Արտակ Բարսեղյանը առաջին հայտարարագրով ներկայացնում է բավականին համես թվեր ու եկամուտներ: Այսպես 2011թ. նա ունեցել է 5 հազար դոլար ու 4 մլն դրամ, աշխատավարձը հարկային տարում կազմել է 9 մլն դրամ, ոչ մի էական փոփոխություն հաջորդ տարի, 2013թ.-ին նա ժառանգությունից գույք է ստանում՝ 80 հազար դոլար արժողությամբ:
2014թ.-ին պատկերն այլ է, դատավորը որպես ժառանգություն ստացել է հասարակական նշանակության շինություն, 9 կետով հայտարարագրել հողոմասեր, ստացել բնակարան ու արտադրական նշանակության շինություն, ընդհանուր՝ 182 մլն դրամ արժողությամբ:
2015թ.-ին պարոն Բարսեղյանը 192 հազար դրամով ավտոտնակ է ձեռք բերել, ինչպես նաև AUDI Q7 QUATTRO 3.6 L մակնիշի ավտոմեքենա՝ 19 մլն-ով:
Դրամական միջոցները տարվա վերջում կազմել են 70 հազար դոլար: Աշխատավարձը հարկային տարում՝ 11 մլն դրամ:
ՀՀ վճռաբեկ դատարանի քաղաքացիական և վարչական պալատի դատավոր Գոռ Հակոբյանը 2011թ. վերջում ունեցել է 33 հազար դոլար ու 2,5 մլն դրամ: Հաջորդ տարիներին դատավորի դրամական միջոցներում էական փոփոխություններ չեն արձանագրվել, 2015թ. վերջում նա հայտարարագրել է 4 մլն դրամ, 10 հազար դոլար ու 1500 եվրո:
Մինչև 2015թ.-ը դատավորի կինն ունեցել է ընդամենը 2000-3000 դոլար դրամական միջոցներ, իսկ նախորդ տարի նա նվիրատվության կարգով ստացել է 16 500 դոլար արժողությամբ մեքենա՝ LEXUS RX 330 մակնիշի, վաճառել ու 5 մլն դրամով (շուրջ 10 հազար դոլար) գնել նույն մակնիշի մեքենա:
Դրամական միջոցները կազմել են 9500 դոլար ու 1 միլիոն դրամ:
Ստորև դիտեք թեմային առնչվող ինֆոգրաֆիկան
Գևորգ Թոսունյան
