Հայաստանի Կարմիր խաչի «Քրոս» կենտրնում ապրիլյան պատերազմի ժամանակ վիրավորված 6 զինծառայող վերականգնողական բուժում է ստանում:
Պայմանագրային զինծառայող Հայկ Սեխիլյանը ողնաշարի կրծքային ողերի բեկորային վիրավորում է ստացել: Մայիսի 30-ի մեր նկարահանման ժամանակ Հայկ Սեխիլյանն անվասայլակից ինքնուրույն չէր կարողանում վեր կենալ: Հայկը նպատակին հասնելու ճանապարհին է. արդեն կարողանում է ոտքի կանգնել: Հայկի առողջական վիճակը նախորդ հանդիպման համեմատ ակնհայտորեն բարելավվել է: Նախկին որոշումները չեն փոխվել. «Քայլելու եմ ու վերադառնամ ծառայության, տղաներիս հետ էլ ավելի շատ ժամանակ եմ անցկացնելու, քան առաջ էի անցկացնում»:
20-ամյա ժամկետային զինծառայող Հայկ Թորոսյանը գլխի բեկորային վնասվածք է ստացել, որի հետևանքով մարմնի ձախակողմյան հատվածը կաթվածահար է եղել: Մայիսի 30-ի դրությամբ Հայկը հենակներով անգամ մի քանի քայլ չէր կարողանում անել, այսօր ժամկետային զինծառայողն առանց հենակների ինքնուրույն շրջում է կենտրոնի տարածքով:
31-ամյա պայմանագրային զինծառայող Դավիթ Համբարձումովն ուղեղի՝ թափանցող հրազենային վիրավորում է ստացել, որի հետևանքով վերջույթներն անշարժացել են: Վերականգնողական կենտրոնի բժիշկների շնորհիվ Դավիթն արդեն լուրջ հաջողություն ունի:
Պատերազմն սկսվելուց 4 օր հետո ժամկետային զինծառայող Դանիելը պետք է զորացրվեր, բայց դիրք բարձրացավ: Առաջնագծում Դանիելը գլխի բեկորային վնասվածք ստացավ, որի հետևանքով թուլացել է մարմնի ձախակողմյան հարվածը:
Վերականգնողական կենտրոնի բժիշկներն այսօր էլ ջանք չեն խնայում պատերազմի մասնակից զինծառայողներին ոտքի կանգնեցնելու համար: Կենտրոնի բժիշկները վստահեցնում են՝ բոլոր զինծառայողներն այստեղից իրենց ոտքով են դուրս գալու:
Մանրամասները՝ տեսանյութում:
