ԿՀՎ նախկին աշխատակից Էդվարդ Սնոուդենը մոտ ժամանակներս կհրապարակի ամերիկյան հատուկ ծառայությունների գործունեության վերաբերյալ մյուս գաղտնի տվյալները և կշարունակի դա անել՝ հայտարարել է սկանդալային Wikileaks պորտալի հիմնադիր Ջուլիան Ասանժը ABC-ի լրագրողների հետ զրույցում:
«Մենք ձեռնարկել ենք շոշափելի միջոցառումներ, որպեսզի ոչ մի պետություն Սնոուդենին չկարողանա խոչընդոտել իր նյութերը հրապարակելու գործում»,- նշել է Ասանժը:
Wikileaks-ի հիմնադիրը նշել է, որ կառավարության և հատուկ ծառայությունների գաղտնի փաստաթղթերի հրապարակումը սպառնալիք չի ներկայացնում մարդկանց կյանքի համար, ինչպես հաստատում են ԱՄՆ-ում:
«Մենք քննարկել ենք վնաս հասցնելու հարցը, սակայն ոչ մի ամերիկացի քաղաքական գործիչ, Պենտագոնի ոչ մի աշխատակից, աշխարհի ոչ մի կառավարություն չի հաղորդել, թե 6 տարվա մեր աշխատանքի ընթացքում մեր կազմակերպության կողմից հրապարակված գոնե մեկ գաղտնի զեկույց ինչ-որ մեկին ֆիզիկական վնաս է հասցրել»,- ասել է Ասանժը:
