«Հըզբոլլահ» լիբանանյան շարժման գրոհայինները պետք է անհապաղ լքեն Սիրիայի տարածքը: Ինչպես հաղորդում է RIA Novosti-ն, նման հայտարարությամբ հանդես է եկել ԱՄՆ Պետդեպարտամենտի ներկայացուցիչ Պատրիկ Վենտրելը:
«ԱՄՆ-ը դատապարտում է Ասադի վարչակարգի շարունակվող հարձակումները Հոմսի քաղաքային բնակչության և Դամասկոսի թաղամասերի վրա: Մենք միջազգային հանրության բոլոր անդամներին կոչ ենք անում Ալ-Ասադին բացատրել, որ նա պետք է դադարեցնի այդ հարձակումները և մարդասիրական կազմակերպություններին, այդ թվում՝ ՄԱԿ-ին և Կարմիր խաչին, անհապաղ անվտանգ մուտք ապահովի՝ վիրավորներին տարհանելու և կենսական կարևորություն ունեցող դեղորայքներ մատակարարելու համար»,- ասել է նա:
Վենտրելը նաև դատապարտել է «Հըզբոլլահ» գրոհայինների մասնակցությունը մարտական գործողություններին:
«Նրանք վարչակարգին օգնում են դաժանորեն ճնշել սիրիացի ժողովրդի օրինական պահանջները՝ ապահովելու ազատություն, արժանապատվություն և ժողովրդավարություն»,- հավելել է նա:
Վենտրելի խոսքով՝ ԱՄՆ-ը շարունակում է աջակցել Սիրիայի ընդդիմությանը:
