Ինչպես հայտնի է, Ազգային ժողովը նախօրեին ընդունեց Ընտրական օրենսգրքում փոփոխություններ և լրացումներ կատարելու մասին օրենքի նախագիծը, որը ձեռք էր բերվել իշխանությունների և ընդդիմության կոնսենսուսի հիման վրա: Սակայն օրենքի նախագիծը կարող է կյանքի կոչվել համապատասխան միջոցների առկայության դեպքում:
ՀՀԿ խմբակցության պատգամավոր Լևոն Մարտիրոսյանը այս առնչությամբ «Առաջին լրատվական»-ի հետ զրույցում նկատեց՝ որքան էլ երևույթը տարակուսելի է, սակայն դա փաստ է. «Իսկապես, եթե ֆինանսավորում չլինի, այդ փոփոխություններն անհնարին կլինի իրագործել»:
Լևոն Մարտիրոսյանը հուսով է, որ այդ գումարը կհայթայթվի, քանի որ բոլորը նախանձախնդիր են, որպեսզի այս փոփոխությունների արդյունքում բարձրանա ընտրությունների նկատմամբ վստահությունը. «12 մլն-ի տեղը գիտենք, մնում է 4 մլն-ը»:
ՀՀԿ-ական պատգամավորը չի կիսում այն կարծիքը, որ մնացյալ գումարը գտնելու հարցում իշխանությունները հապաղում են, քանզի փոփոխությունները միայն երեկ են հաստատվել, իսկ ընդհանուր առմամբ Ընտրական այս նոր օրենսգիրքը նա համարում է գրեթե կատարյալ, եթե նախատեսված փոփոխությունները իրագործվեն:
Այնուամենայնիվ, մեր զրուցակիցը ամենակարևորը համարում է ընտրությունների նկատմամբ վստահության բացակայությունը, իսկ դա պայմանավորված է նրանով, որ ընդդիմությունը չունի կառավարող ուժին հավասար ռեսուրսներ. «Իսկ դրա համար իշխանությունը մեղավոր չէ: Կառավարող ուժը չի կարող, օրինակ, մեղավոր լինել այն բանում, որ ընդդիմադիր ուժը միավորված չէ:
Փաստորեն, իշխանության կողմից ընդդիմության պահանջները կատարվել են: Եվ եթե հաջորդ տարի արդեն այս փոփոխված Ընտրական օրենսգրքով, օրինակ, Հանրապետականը նորից մեծամասնություն ստանա, այդ ժամանակ ի՞նչ է ասելու ընդդիմությունը: Սա կարծես ընդդիմության համար մազոխիզմի նման մի բան է, ասես հաճույք ստանան դրանից: Այսինքն՝ հարցը միայն տեխնիկական խնդիրները չեն, այլ պետք է աշխատել մարդկանց ուղեղների վրա, պետք է միավորվել, իսկ այժմ ստեղծվեց իրենց ընդդիմություն հռչակած առնվազն 5-6 կուսակցություն: Այսինքն՝ տեղի է ունենում ուժերի փոշիացում»:
