Մայիսի 10-ին Գերմանիայի Դուսելդորֆ քաղաքում տեղի ունեցավ «Եվրատեսիլ-2011» երգի մրցույթի առաջին կիսաեզրափակիչ փուլը: Մասնակցում էին 19 երկրներ, որոնց ելույթների հերթականությունը որոշվել էր հյուրընկալող երկրի` մրցույթի կազմակերպիչների անցկացրած վիճակահանությամբ, որի արդյունքներով` Հայաստանը ներկայացնող Էմմին «Բում-բում» երգով ելույթ ունեցավ 4-րդը:
Բեմում ներկայացվեց բռնցքամարտի տեսարան, որը խորհրդանշում էր սիրո համար անվեհեր պայքարը: Էմմիի պրոֆեսիոնալ կատարումը, հսկա ձեռնոցը, նրա և պարախմբի վառ հագուստները մեծ տպավորություն թողեցին հանդիսատեսի վրա: Հունաստանից հրավիրված պրոֆեսիոնալ պարախմբի անդամներից յուրաքանչյուրը հայտնի արտիստ է Հունաստանում և Կիպրոսում: Բեմական կերպարների ստեղծումը վստահված էր հայ մասնագետներին:
«Բում-բում»-ը համարվում էր ակնհայտ առաջատար և լուրջ մրցակից բոլոր մասնակիցների համար: Այդ էին վկայում արտասահմանյան մամուլի ամենօրյա անդրադարձները, Գերմանիան ներկայացնող «Եվրատեսիլ-2010» մրցույթի հաղթող Լենայի առանձնահատուկ համակրանքն ու ուշադրությունը մեր երգի նկատմամբ, ինչպես նաև այն, որ ակումբներում առավելապես հնչում էր հենց այս երգը: Ելույթն ամբողջական էր և համապատասխանում էր «Եվրատեսիլ»-ի բոլոր չափանիշներին: Չնայած այս ամենին` «Բում-բում»-ը չանցավ եզրափակիչ փուլ 20 երկրների sms հաղորդագրությունների և պրոֆեսիանալ ժյուրիի քվեարկության արդյունքներով:
Քվեարկող երկրներն էին Լեհաստանը, Նորվեգիան, Ալբանիան, Թուրքիան, Սերբիան, Ռուսաստանը, Շվեյցարիան, Վրաստանը, Ֆինլանդիան, Մալթան, Սան-Մար ինոն, Խորվաթիան, Իսլանդիան, Հունգարիան, Պորտուգալիան, Լիտվան, Ադրբեջանը, Հունաստանը, Իսպանիան և Մեծ Բրիտանիան:
Եզրափակիչ փուլ չանցավ նաև Նորվեգիան, որը նույնպես համարվում էր առաջատար և ակնհայտորեն լավ հանդես եկավ: Այս ամենը դժգոհությունների ալիք է բարձրացրել մամուլում և համացանցում:
Հայաստանյան պատվիրակությունը իր ներկայացուցչի ելույթը գնահատում է պրոֆեսիոնալ, վառ և հաջողված: Շնորհակալ է բոլոր աջակիցներին, երկրպագուներին, ովքեր քվեարկել են և ցանկացել են տեսնել Հայաստանը եզրափակիչ փուլում:
Հանրային հեռուստաընկերության և Էմմի համագործակցությունը կշարունակվի նոր նախագծերով: Իսկ մնացած հարցերի պատասխանները կտրվեն մամլո ասուլիսի ժամանակ մեր պատվիրակության վերադարձից անմիջապես հետո:
«Եվրատեսիլ-2011» երգի մրցույթի
հայաստանյան պատվիրակության ղեկավար
Գոհար Գասպարյան