Ամերիկահայ գործարար, «Արարատ» ֆուտբոլային ակումբի նախագահ, «Արցախ» բանկի 40 տոկոս բաժնետեր, շինարարական «Իտարգո» ընկերության տեր Հրաչ Կապրիելյանի և ԲՀԿ-ական պատգամավոր, «Հայկարշին» ընկերության սեփականատեր Արագած Ախոյանի վեճը սպառնում է հասնել միջազգային ատյաններ` Եվրադատարան:
Վերաքննիչ դատարանը վերջերս մերժել է Արագած Ախոյանի բողոքը` «Իտարգոյի» 20 տոկոս իր մասնաբաժինը 2 տոկոսի իջեցնելու գործով: Ա. Ախոյանը հայտարարում է, որ կդիմի Վճռաբեկ, ապա` միջազգային ատյաններ: Գործարար պատգամավորի և ամերիկահայ գործարարի վեճը սկսվել է 8 տարի առաջ, երբ Հրաչ Ներսես Կապրիելյանի հետ ստեղծել են «Իտարգո Քոնսթրաքշն» շինարարական ընկերությունը: «Ես եմ ստեղծել հիմքից այդ շինարարական կազմակերպությունը, որը շատ մեծ թափ հավաքեց, սկսեց մի քանի լուրջ պատվերներ կատարել: Անցավ երկու տարի, ինչ-ինչ առաջարկներ ի հայտ եկան, որոնց ես չհամաձայնեցի որպես բաժնետեր և հրաժարվեցի տնօրեն աշխատելուց: Պայմանավորվեցինք, որ ես դուրս եմ գալու, և իմ հասանելիք գումարը վերադարձնելու են ինձ, և մինչև հիմա այդ գումարը չեն տվել»,- ասաց Ախոյանը` շարունակելով. «Այսօր, իմ կարծիքով, կեղծ ներդրումներ են ցույց տալիս «Իտարգո Քոնսթրաքշնում», որտեղ կինս 20 տոկոս բաժնետոմս ունի, որ դրանք հավասարեցնեն զրոյի»:
Ամերիկահայ Հրաչ Կապրիելյանը մեր հարցին, թե Արագած Ախոյանն ասում է, որ Դուք կեղծ բարերար եք, կեղծ ներդրումներ եք ներկայացնում և իր 20 տոկոս բաժնեմասը իջեցրել եք 2 տոկոսի, պատասխանեց. «Նման բան չենք արել, չես կարող օրենքը խախտել: Դատարան կա, բան կա Հայաստանի մեջ, ինքն էլ դատարան գնաց: Վերջին նիստը շահել ենք: Չեմ կարծում, որ դրսից եկող հայը կարող է խաբել Հայաստանի քաղաքացու, կարող են գալ դրսից և խաբել: Անկարելի է նման բանը: Իրականությունը շուտով մեջտեղ կելնի: Դատարանները մենք շահում ենք»: Մեր հարցին, թե այդ դեպքում ինչո՞ւ է իրեն նման մեղադրանք ներկայացվում, Կապրիելյանը պատասխանեց. «Մարդը ինչ ուզում, խոսում է, չես կարող լեզուն արգելել»:
Հ. Կապրիելյանին հարցրեցինք, թե ի վերջո` պա՞րտք է Ա. Ախոյանին, պատգամավորն ասում է, որ մի քանի հարյուր հազար դոլար պարտք եք: «Պարտք չեմ: Ես ոչ մի բան պարտք չեմ: Դատի մեջ ենք, դատը շահում ենք, եթե հանցավոր լինեի, դատը չէի շահի»,- հայտարարեց Կապրիելյանը` հավելելով. «Արագած Ախոյանը իր 20 տոկոսը ինձ հետ էր տվել, որովհետև պրոբլեմներ կային իր կողմից, երբ ինքը այդ ընկերության տնօրեն էր, և գլխավոր դատախազը` Աղվան Հովսեփյանը, ինձ հրավիրեց իր օֆիսը, ասեց` մեր լավ տղան է, լավ ընկերներ ենք: Այդ 20 տոկոսը ես հետ տվեցի ճնշման տակ: Աղվան Հովսեփյանն անձամբ էնտեղ էր»:
Մեր դիտարկմանը, թե Ախոյանն ասում է , որ դիմելու է Վճռաբեկ դատարան և մինչև Եվրադատարան գնալու է, Կապրիելյանը հայտարարեց. «Թող գնա, պրոբլեմ չկա: Ինչ կարող եմ ասել: Մի քանի հազար դոլարի համար իրեն պիտի խաբե՞մ, միլիոն էլ լինի, չեմ խաբի: Ես ո՞ւմ եմ խաբել: Մենք մեր դրամները բերել դրել են ենք և ոչ մի բան ետ չենք ստացել: Այդ «Իտարգո» ֆիրմայում փողերը դրել ենք, շենքը սարքում ենք, և դեռ չի ավարտվել: Ամեն բան օրինական է մեր ընկերության մեջ»: Հ. Կապրիելյանը հայտարարեց, թե Ախոյանը «Իտարգոյում» «20 հազար դրամ է դրել, մենք դրել ենք 3-4-5 մլն-ից ավելի»: «Մենք դատարանում ենք, թող ինքն այդ ամենը ցույց տա, որ իրավունք ունի: Իմ խիղճը հանգիստ է»,-պնդեց ամերիկահայ գործարարը:
Արդեն երեք տարի Հ. Կապրիելյանի հետ կապված գործ է քննում նաև ՀՔԾ-ն` խարդախությամբ գույք ձեռք բերելու փաստով: Մեղադրանք դեռ չկա: Մեր հարցին, թե մտավախություն չունե՞ք, որ հնարավոր է մեղադրանք առաջադրվի Ձեզ, Կապրիելյանը պատասխանեց. «Այո, շարունակվում է այդ պրոցեսը, և ստորագրություններ կան, բաներ կան, որ մենք ամեն բան վճարել ենք: Սխալ բան չենք արել: Ամեն բան մեջտեղ թող ելնի: Եթե ես խարդախություն եմ արել, թող ինձ բանտ դնեն: Միշտ նոր հարցումներ են անում: Դատախազությունից հարցրեք: Արդարությունով կշահենք, պրոբլեմ չկա»:
ԲՀԿ-ական Ա. Ախոյանի խոսքերով` իրավապահ մարմինները շատ զգույշ են սփյուռքահայերի նկատմամբ, որ հանկարծ ոչ մի սխալ բան թույլ չտան: «Համարելով խոպան մեր նոր կազմավորվող երկիրը` ոմանք գտնում են, որ բոլորը պետք է խոնարհվեն իրենց առաջ. ինչի՞, որովհետև գումար ունեն և ուզում են գործունեություն ծավալել: Խնդրեմ, եկեք ծավալեք, բայց մի ցույց տվեք, որ առավելություն ունեք մեր նկատմամբ»: ՀՔԾ-ում նախաքննությունը, ըստ պատգամավորի, ավարտական փուլում է. «Խոսքը լուրջ գումարների մասին է, և ինքը վճարելու է դա, չնայած որ լսել եմ, ասում է` միլիարդներ կծախսեմ, բայց չեմ վճարի, իսկ ես ասում եմ` կվճարի: Հաշտության եզրը` վճարելն է, չվճարի, մինչև վերջ գնալու եմ»:
«Եթե ես խախտում եմ արել, թող ինձ բանտ դնեն, բայց ես ոչ մեկին պարտք չեմ: Ես առաջիկա օրերին գալու եմ Հայաստան, բան չունեմ վախենալու»,-հայտարարեց Հ. Կապրիելյանը:
