Ամերիկյան վարչակազմը պահանջում է, որպեսզի Սիրիայի կառավարական զորքերը դադարեցնեն հարձակումները Հոմս քաղաքի շրջանում խաղաղ բնակիչների նկատմամբ: Այս մասին հայտարարել է Պետդեպի պաշտոնական ներկայացուցիչ Պատրիկ Վենտրելը՝ փոխանցում է ITAR-TASS-ը:
Նա միջազգային հանրությանը կոչ է արել Ասադի ռեժիմից պահանջել մուտքի թույլտվություն մարդասիրական կազմակերպությունների համար, այդ թվում՝ ՄԱԿ-ի ու Կարմիր խաչի միջազգային կոմիտեի, որպեսզի վերջիններս կարողանան վիրավորներին տարհանել և տուժածներին կենսական անհրաժեշտ օգնություն ցուցաբերել:
Վենտրելի խոսքով՝ Սիրիայի նախագահի խոչընդոտումը չի կարող արդարացում ունենալ:
Պետդեպի ներկայացուցիչը վստահեցել է, որ Վաշինգտոնը կշարունակի Գերագույն զինվորական խորհրդին ու Ազգային կոալիցիային անհրաժեշտ բուժօգնություն տրամադրել: Ընդգծվում է, որ երկու կազմակերպություններն անում են հնարավոր ամեն ինչ՝ ճգնաժամը հաղթահարելու համար:
Վենտրելը նշել է, որ ԱՄՆ-ը դատապարտում է «Հըզբոլլահի» գրոհայինների կողմից սիրիական քաղաքների վրա իրականացվող հարձակումները: Վաշինգտոնը պահանջել է, որպեսզի Թեհրանի աջակցությունը վայելող այդ և այլ կազմակերպություններ անհապաղ լքեն Սիրիան:
