Եվրամիությունից դուրս գալու մասին Մեծ Բրիտանիայի որոշումը ծանր ճգնաժամ է առաջացրել ֆինանսական շուկաներում՝ հայտարարել է ամերիկացի միլիարդատեր, ներդրող Ջորջ Սորոսը Եվրախորհրդարանի լսումներում։ Այս մասին հայտնում է ValueWalk պորտալը։
ԵՄ-ից Մեծ Բրիտանիայի դուրս գալը մի կողմից՝ ստեղծել է ԵՄ-ի թարմացման հնարավորություն, մյուս կողմից՝ սրել երկու վերահաս վտանգները՝ կարծում է ֆինանսիստը։
«Նախ՝ այն ճգնաժամ է սանձազերծել ֆինանսական շուկաներում, որը ծանրությամբ համեմատելի է 2007-2008թթ. ճգնաժամի հետ»,- հայտարարել է Սորոսը։ 2007-2008թթ. ֆինանսական ճգնաժամը, որը սկսվել էր ԱՄՆ-ում, վերաճեց համաշխարհային տնտեսական ճգնաժամի։
Սորոսի խոսքով՝ մինչ Brexit-ը ճգնաժամը զարգացել է դանդաղ, սակայն այժմ դրա տեմպերն արագանում են։ Ներդրողն առավել հավանական հետևանք է համարում Եվրոպայում դեֆլյացիայի ուժեղացումը։ Եվրոպական բանկային համակարգի համար, որը դեռևս ուշքի չի եկել նախկին դժվարություններից, դա լուրջ փորձություն կդառնա՝ կարծում է Սորոսը։
Միլիարդատերը երկրորդ վտանգ է համարել սպառնալիքներն անվտանգության ոլորտում, քանի որ Brexit-ը, նրա խոսքով՝ քաջություն է հաղորդել արտաքին թշնամիներին։
