ԱԺ Ժառանգություն եւ ՀՅԴ խմբակցությունների անդամներ Անահիտ Բախշյանի եւ Լիլիթ Գալստյանի խոսքերով կինը քաղաքականության մեջ կարեւոր դեր ունի: «Ցանկացած բնագավառում, որտեղ կանայք շատ են ներկայացված, հատկապես այն կանայք, որոնք սկզբունքային են եւ իրենց ասելիքը գործով են հասցնում հասարակությանը, Հայաստանի կառավարման համակարգում եւս էական փոփոխություններ կլինեն, բայց ցավոք, դա մեզանում դեռ չի գնահատվում»,- ասաց Անահիտ Բախշյանը:
Լիլիթ Գալստյանի խոսքերով, մենք արական քաղաքական մշակույթում ենք ապրում. «Սահմանադրության 14-րդ հոդվածն է ամրագրում կին-տղամարդ հավասարության մասին, սակայն փաստացի դա այդպես չէ: Ժողովրդավար եւ զարգացած է այն հասարակությունը, որը իրապես օգտագործում է կնոջ պոտենցիալը: Այն օրենսդիր մարմիններում, որտեղ կանայք 30 տոկոս ձայն ունեն, հնարավոր է հասնել առավել մեծ արդյունքների օրինաստեղծ գործունեության մեջ»:
Լիլիթ Գալստյանի կարծիքով, մեր երկրում ընդհանրապես մարդու իրավունքները պաշտպանված չեն, ուր մնաց, թե խոսենք կանանց իրավունքների պաշտպանվածության մասին. «Մի շարք միջազգային կազմակերպությունների հետազոտություններն էլ ցույց են տվել, որ մարդու իրավունքների պաշտպանվածության առումով Հայաստանը լավագույն դեպքում հարյուրյակից առաջ չի անցնում»:
Գալստյանը տեղեկացրեց, որ Հայաստանը ԵԽԽՎ-ի առջեւ հանձնառություն ունի ԱԺ-ում կանանց ներկայացվածությունը հասցնելու 40 տոկոսի:
Իսկ ինչ վերաբերում վարչապետի այն հայտարարությունը, թե առողջապահության համակարգը ամենակոռումպացվածն է, իսկ այդ համակարգում մեծ մասը կանայք են, Գալստյանի կարծիքով, մեր երկիրն այնքան խորն է թաղված կոռուպցիայի մեջ, որ համակարգեր կամ անձինք առանձնացնելը փրկություն չէ: